دۋبايدا روبوت-پوليتسيا ءوز قىزمەتىنە كىرىستى

بىرىككەن اراب امىرلىكتەرىندەگى ەڭ ءىرى مەگاپوليس دۋباي قالاسى ءححى عاسىرداعى جاڭا تەحنالوگيالاردى  كۇندەلىكتى تۇرمىسقا پايدالانۋمەن الەمدە كوشباسشى بولىپ تابىلادى. ال قالادا سوڭعى ۋاقىتتا قولدانىسقا ەنگىزىلگەن جاڭا يننوۆاتسيالىق  تەحنالوگيالاردىڭ ءبىرى – روبوت-پوليتسيا فانتاستيكالىق فيلمدەردىڭ اقيقاتقا اينالۋىنداعى قادامداردىڭ ءبىرى ىسپەتتى.

ادام كەيپىندە جاسالعان ريم روبوتى 2011 جىلى يسپانيالىق PAL Robotics كومپانياسىندا جاسالعان. روبوتتاردىڭ مىندەتى – اۋەجاي، مۇراجاي، اۋرۋحانا سەكىلدى قوعامدىق ورىنداردا ينتەراكتيۆتى حابارلامانى تاراتۋ.

ءريمدى جۇمىسقا بەيىمدەۋ شارالارى دۋباي پوليتسيالارى مەن PAL Robotics كومپانياسىنىڭ ينجينەرلەرىمەن جۇرگىزىلىپ، جۇمىس 2016 جىلى تولىق اياقتالعان بولاتىن.

قالالىق پوليتسيانىڭ باستىعى، گەنەرال حاليد ناسەر الرازۋكيدىڭ CNN ارناسىنا بەرگەن سۇحباتىندا: «روبوتتار الدىمەن ادامدار كوپ جۇرەتىن ساۋدا ورتالىقتارىندا، تۋريستىك ورىنداردا سىناقتان وتكىزىلەدى. كەيىن روبوكوپتارعا ايىپپۇلداردى قابىلداپ، ءتارتىپ بۇزۋشىلاردى تىركەپ، ازاماتتاردىڭ ارىزدارىن ساراپتاۋ دا تاپسىرىلاتىن بولادى» - دەگەن.

قالا اكىمشىلىگىنىڭ جوسپارىنا سايكەس، 2020 جىلعا دەيىن روبوت-پوليتسيالاردىڭ ءموبيلدى نۇسقالارىن شىعارۋدى، ال 2030 جىلعا دەيىن ءتارتىپ ساقشىلارىنىڭ 25 پايىزىن وسى تەكتەس روبوتتار قامتيتىنداي ناتيجەگە جەتكىزبەك.

“The Qazaq Times”