ترامپ ءوز قۇپياسىنىڭ اشىلۋىنان قورقىپ، كوميدى جۇمىستان قۋعان

اقش پرەزيدەنتى دونالد ترامپ بەيسەنبى كۇنى سويلەگەن سوزىندە ءوزىنىڭ ادىلەت مينيسترلىگىنىڭ ۆيتسە-ءمينيسترى رود روسەنستەيننىڭ (Rod Rosenstein) ۇسىنىسى بويىنشا FBI-دىڭ باسشىسى جەيمس كوميدى جۇمىستان بوساتقانىن ايتتى. ونىڭ ايتۋىنشا بۇل ۇسىنىستى قابىلداپ الۋدان بۇرىن دا كوميدى جۇمىستان بوساتۋعا ءازىر ەكەن. الايدا اقۇي شەنەۋنىكتەرىنىڭ سوزىنە قاراعاندا، پرەزيدەنت بۇل شەشىمگە كەلۋىنە ادىلەت ءمينيسترىنىڭ ورىنباسارىنىڭ جانە باس پروكۋرور جەفف سەسسيونستىڭ ۇسىنىسى باستى سەبەپكەر بولعان. NBC-ءدىڭ ايتۋىنشا، اقش جەرگىلىكتى ۋاقىتىمەن بەيسەنبى كەشتە ترامپتىڭ وسى شەشىمى تۋرالى ارناۋلى حابار تاراتادى.

“The Wall Street Journal” باسىلىمىنىڭ حابارلاۋىنشا، اتىن ايتقىسى كەلمەگەن اقش جوعارى شەندىلەرىنىڭ بىرەۋى جەيمس كوميدىڭ وتكەن اپتادا ادىلەت مينيستىرلىگىنە ۇسىنىس جولداپ، رەسەيدىڭ 2016 جىلعى اقش پرەزيدەنت سايلاۋ ىسىنە ارالاسقانىن تەكسەرۋ كەرەكتىگىن ايتقان. مىنە بۇل ۇسىنىسى كوميدىڭ جۇمىستان بوساتىلۋىنا باستى سەبەپ بولدى دەۋگە بولادى. اقۇي سەيسەنبى كۇنى جاريالاعان مالىمدەمەسىندە كوميدىڭ جۇمىستان بوساتىلۋى حيللاري كلينتوننىڭ جەكەلىك ەلەكتروندى پوشتا ساندىعىن اقتارۋ ارەكەتى دەپ كورسەتكەن ەدى.

اقش-تىڭ كوپتەگەن شەنەۋنىكتەرى كوميدىڭ جۇمىستان بوساتىلۋ ىسىنە الاڭداۋشىلىق بىلدىرۋدە. رەسەي مەن ترامپ اراسىنداعى قارىم قاتىناستى تەكسەرمەكشى بولعان FBI باسشىسىنىڭ جۇمىستان قۋىلۋى، شىنىندا پرەزيدەنتتەرىنە دەگەن كۇماندى ارتتىرا تۇسپەك. جوعارىداعى اقش رەسمي وكىلدەرىنىڭ ايتۋىنشا، كومي دۇيسەنبى كۇنى كەيبىر كونگرەس مۇشەلەرىنە ادىلەت مينيسترلىگىنەن رەسەيدىڭ اقش پرەزيدەنت سايلاۋ ىسىنە ارالاسقانىن تەكسەرۋ جۇمىسىنا كوبىرەك قارجىلىق قولداۋ كورسەتۋىن تالاپ ەتكەنىن ايتقان.

مىنە وسىلاردىڭ ءبارىن ساراپتاي كەلە، اقش شەندىلەرىنىڭ ءوز پرەزيدەنتتەرىنە دەگەن كۇمان-كۇدىگىنىڭ ارتا تۇسكەنىن، وعان ترامپتىڭ كوميدى جۇمىستان بوساتۋى سەبەپشى بولعانىن بىلۋگە بولادى. ءىستىڭ تۋرا بەتىنە قارار بولساق 2016 جىلعى اقش پرەزيدەنت سايلاۋىنا رەسەيدىڭ ارالاسۋ ءىسى اشىلار بولسا، ترامپتىڭ از بولماعان قۇپيالىعى اشىلۋى مۇمكىن. سونىڭ الدىن الۋ ءۇشىن ايبارلى ۇيىمنىڭ باستىعى بولعان كوميدى جۇمىستان بوساتقان. ءبارى بىردەي ترامپقا دەگەن اقش كونگرەسى مەن وزگە دە شەنەۋنىكتەرىنىڭ كۇمانى كۇشەيىپ تۇر.

“The Qazaq Times”