وپەك ەلدەرى وسى جىلدىڭ 25 مامىرىندا ۆەنادا وتەتىن كەزدەسۋدە مۇناي كولەمىن قىسقارتۋدىڭ تاعى بىرنەشە جولىن قاراستىراتىن بولادى. بۇل تۋرالى بىرىككەن اراب امىرلىگىنىڭ ەنەرگەتيكا ءمينيسترى سۋحەيل ال-مازرۋي مالىمدەگەن.

"مينيسترلەرگە قارا التىن كولەمىن قىسقارتۋدىڭ بىرنەشە نۇسقاسى ۇسىنىلادى. ولار وزدەرى ناقتىستىن تاڭدايدى. كەلەسى كەزدەسۋدە وڭ ناتيجە بولادى دەپ ويلايمىن", - دەپ كەلتىرەدى Bloomberg اگەنتتىگى ءمينيستردىڭ ءسوزىن. سونداي-اق، ول ۆەنالىق كەلىسىمنىڭ مەرزىمىن ۇزارتۋدى قولداۋعا دايىن ەكەنىن ايتقان. ونىڭ سوزىنشە، اقش-تىڭ مۇناي كولەمىن ارتتىرۋى  اتالعان كەلىسىمگە قاۋىپ توندىرە قويمايدى.

ەسكە سالايىق، 2016 جىلدىڭ 30 قاراشاسىندا وپەك ۆەنادا بولعان كەزدەسۋدە كۇنىنە وندىرىلەتىن مۇناي كولەمىن قازان ايىنداعى ءوندىرىس دەڭگەيىنەن 1,2 ملن باررەلگە دەيىن تومەندەتۋ تۋرالى كەلىسىمگە كەلگەن ەدى. ال كارتەلگە مۇشە ەمەس 11 ەل 10 جەلتوقسان كۇنى وزدەرىنىڭ ءوندىرىسىن تاۋلىگىنە 558 مىڭ باررەلگە دەيىن ازايتۋعا كەلىستى. رەسەي 300 مىڭ باررەلگە دەيىن قىسقارتۋعا ۋادە ەتتى.

بۇل كەلىسىم 2017 جىلدىڭ 1 توقسانىنا دەيىن دەپ بەكىتىلگەن بولاتىن. وسىعان بايلانىستى مۇناي كولەمىن تاعى دا قىسقارتا تۇرۋ تۋرالى ەندىگى كەلىسسوز شەشىمى 25 مامىردا بەلگىلى بولادى.

قازاقستان نە دەيدى؟ وتكەن اپتادا قر ەنەرگەتيكا ءمينيسترى قانات بوزىمباەۆ جوعارىدا اتالعان كەلىسىمدى 9 ايعا سوزۋ ماسەلەسى تالقىلانىپ جاتقانىن ايتقان. ال رەيتەر اگەنتتىگى بولسا، كارتەل مۇشەلەرى كەلىسىم مەرزىمىن 9 ايدان دا كوپ مەرزىمگە ۇزارتۋدى تالقىلاپ جاتقانىن مالىمدەگەن.

“The Qazaq Times”