الەمدەگى ەڭ جاس كوشباسشىلار

39 جاستاعى ەممانۋەل ماكروننىڭ فرانتسيا پرەزيدەنتى بولىپ سايلانۋى، الەمدەگى جاس كوشباسشىلار ءتىزىمىن جاڭارتتى. وسىعان دەيىن فرانتسيا تاريحىندا جاس ليدەر رەكوردىن بوناپارت ناپولەون 170 جىل بويى ساقتاپ كەلگەن بولاتىن.

ەممانۋەل ماكرون. فوتو: Christian Hartmann/Reuters

ول 1848 جىلى تاققا وتىرعاندا 40 جاستا ەدى. فرانتسيا حالقىنىڭ ورتاشا جاسى 41 جاستى قۇرايتىنىن ەسكەرسەك، فرانتسۋز ەلىنىڭ تىزگىنىن جاستار ۇستادى دەۋگە تولىقتاي نەگىز بار. BBC ارناسى فرانتسيانىڭ جاس پرەزيدەنتىمەن بىرگە الەمنىڭ ءبىر قاتار ەلىندەگى جاس كوشباسشىلاردى تۇگەندەپ شىققان ەدى.

Vanessa D‘Ambrosio. فوتو: Twitter

سان مارينو باسشىسى – ۆانەسسا د.امبروسيو

بۇل ءتىزىمنىڭ باسىندا سان-مارينونىڭ بيلەۋشىسى ۆانەسسا د.امبروسيو (Vanessa D‘Ambrosio) اتتى ايەل ساياساتكەر تۇرادى. سان-مارينو – الەمدەگى ەڭ شاعىن ەلدەردىڭ ءبىرى. يتاليانىڭ سولتۇستىك-شىعىسىندا ورنالاسقان. حالىق سانى 33 مىڭ. بۇل ەلدەگى بيلىك جۇيەسى وزگەشە. ەل بيلىگىنىڭ تىزگىنى ەكى دەپۋتاتقا جۇكتەلەدى ءارى التى ايدا ءبىر رەت اۋىستىرىلىپ وتىرادى. سونىڭ ءبىرى الەمدەگى ەڭ جاس كوشباسشى ايەل سانالاتىن ۆانەسسا. ول 29 جاسىندا جەر اۋماعى 61 شارشى شاقىرىم سان مارينو رەسپۋبليكاسىنىڭ بيلىگىن ۇستاعان.

فوتو: The Wall Street Jounal

سولتۇستىك كورەيا ەڭ جوعارى باسشىسى – كيم جوڭ ۋن (Kim Jong-un/ كيم چەن ىن)

ول تۋرالى وسى مىڭ جىلدىقتاعى ەڭ جاس ءارى اتىشۋلى بيلەۋشى بولۋى مۇمكىن دەگەن بولجام بار. ونىڭ الەمدى دۇرلىكتىرۋ ارەكەتىن ەشكىم قايتالاي المايتىنىنا بارلىق ساراپشىلار سەنىمدى. 34 جاسىندا كورەي حالىقتىڭ دەموكراتيالىق رەسپۋبليكاسىنىڭ ەڭ جوعارى باسشىسى اتاندى. سولتۇستىك كورەيا يادرولىق جانە الىس قاشىقتىقتاعى زىمىران باعدارلاماسىن دامىتۋ كيم جوڭ ءۋننىڭ اتاعىن الەمگە جايدى.

جۋري راتاس. فوتو: Sputnik ەستونيا.

ەستونيا باسشىسى – جۋري راتاس

2016 جىلى 38 جاستاعى جۋري راتاس ەستونيانىڭ بيلىك باسىنا كەلدى. ونىڭ بيلىككە كەلۋىنە قولداۋشىلىق ەتكەندەرى بالتىق ەلدەرىنىڭ ورىس ءتىلدى از ۇلتتارى بولدى. بۇل ەل 1991 جىلى كەڭەس وداعىنان العاشقىلاردىڭ ءبىرى بولىپ ءوز تاۋەلسىزدىگىن جاريالاعان بولاتىن. كرەمل ەستونيا رەسپۋبيلكاسىن 1991 جىلى قىركۇيەكتە رەسمي دەربەس ەل دەپ مويىنداعان.

گرويسماننىڭ سەمياسى. فوتو: 24سمي

ۋكراينا پرەمەر-ءمينيسترى – ۆلاديمير گرويسمان

2016 جىلى 38 جاستاعى گرويسمان ۋكراينا پرەمەر-ءمينيسترى بولىپ قىزمەت اتقاردى. الايدا، ەۋروپاداعى ەكىنشى ۇلكەن ەلدىڭ بيلىك تىزگىنى تولىعىمەن پەتر پوروشەنكونىڭ قولىندا. دەگەنمەن، گرويسمان ۋكراينا تاريحىنداعى ەكىنشى ەڭ جاس پرەمەر-ءمينيسترى بولىپ سانالادى. ول ينتەرناتسيوناليست بولعانىمەن، كونسەرۆاتيۆتىك پوزيتسيانىڭ بيلىگىن اتقارۋشى. سونىمەن بىرگە گرويسمان ۋكراينانىڭ ناتو جانە ەو-عا مۇشە بولۋىن قولدادى. دەموكراتيانى قوس قولىن كوتەرە قولداعانىمەن ءبىر جىنىستى نەكەگە قارسى تۇرعان ساياساتكەر.

بۋتان پاتشاسى – دجيگمە كحەسار نامگيال ۆانگچۋك. فوتو: CNN

بۋتان پاتشاسى – دجيگمە كحەسار نامگيال ۆانگچۋك

ەگەر الەمدەگى ەڭ جاس كوشباسشىلار ءتىزىمى پاتشالىق وتباسىلاردى دا قامتيتىن بولسا، جوعارى دا اتالعان بۋتان كورولى دە كىرەر ەدى. 37 جاستاعى جاس پاتشا سول ەل تاريحىندا دا ەڭ جاس بيلەۋشى بولىپ سانالادى. ۇلىبريتانيانىڭ بوستون ۋنيۆەرسيتەتى مەن وكسفورد ۋنيۆەرسيتەتىندە ءبىلىم العان. 2006 جىلى بۋتان پاتشا تاعىنا وتىردى. ونىڭ جانە «الەمدەگى ەڭ ادەمى كورول» دەگەن اتى دا بار. بۋتان جانە وعان كورشى ەلدەردە جوعارى بەدەلگە يە. تاققا وتىرا سالىسىمەن مەملەكەتتىڭ ساياسي جانە ەكونوميكالىق دامۋىن ىلگەرىلەتەتىن رەفورمالار جاسادى. ەل ۇكىمەتى كونستيتۋتسيالىق مونارحيا تۇرىندە وزگەرتىلدى. ەل ەكونوميكاسى دا جاندانىپ، تۋريزم دامىدى.

كاتاردىڭ تاق مۇراگەر حانزاداسى. فوتو: mphc.com

كاتاردىڭ مۇراگەر حانزاداسى – شەيح تاميم بين حاماد ءال-ساني

2013 جىلى ماۋسىم ايىندا كاتار ءامىرشىسى ءامىر شەيح حاماد ءوزىنىڭ ءتورتىنشى ۇلى 32 جاستاعى شەيح تاميم بين حاماد ءال-سانيدى كاتاردىڭ تاق مۇراگەر حانزاداسى ەتىپ جاريالادى. قازىر 36 جاستاعى كاتار حانزاداسى ۇلىبريتانياداعى «Sanders Hess» ارنايى اسكەري اكادەميادا تاربيەلەنۋدە. ەندى ءبىر جاعىنان كاتار قارۋلى كۇشتەر كومانديرىنىڭ ورىنباسارى جانە كاتار ۇلتتىق وليمپيادا كوميتەتىنىڭ توراعاسى رەتىندە قىزمەت ەتەدى.

“The Qazaq Times”