وڭتۇستىك كورەيانىڭ كەلەسى پرەزيدەنتى كورەي تۇبەگى ماسەلەسىنە نۇكتە قويۋى مۇمكىن

اقش-تىڭ سولتۇستىك كورەيانى وقشاۋلاۋ جوسپارى الداعى اپتادا بولاتىن وڭتۇستىك كورەياداعى پرەزيدەنت سايلاۋىنا كەلىپ تىرەلگەلى تۇر. ال وڭتۇستىك كورەياداعى پرەزيدەنت سايلاۋدا كورشىلەس ءارى باۋىرلاس ەلمەن بىرلىكتى نىعايتۋدى قولداۋشى كانديداتتىڭ جەڭىسكە جەتۋى مۇمكىن دەگەن بولجام بار.

پرەزيدەنتتىككە كانديدات ءمۇن جاەن (Moon Jae-in) 10 جىل بۇرىن شتاب باستىعى سالاۋاتىمەن سولتۇستىك كورەيانىڭ قازىرگى باسشىسى جانە ونىڭ اكەسىمەن پيوڭياڭ (پحەنيان) قالاسىندا كەزدەسكەن بولاتىن. ول كەزدە وڭتۇستىك كورەيا تەرىستىك باۋىرلارىنا جومارتتىق ساياساتىن قولدانىپ، گۋمانيتارلىق جانە ەكونوميكالىق كومەك بەرۋگە كەلىسكەن بولاتىن. بۇل ەكى ەل تاريحىندا «كۇن شۇعىلاسى ساياساتى» (Sunshine Policy) دەگەن اتپەن بەلگىلى.

سايلاۋ ناۋقىنىنىڭ قازىرگى بەينەسىنەن الىپ قارعاندا، ءمۇن جاەننىڭ سايلاۋدا جەڭىسكە جەتەدى دەپ كۇتىلۋدە. سونىمەن بىرگە، ەگەر ول پرەزيدەنتتىككە كەلەر بولسا، وندا بۇرىنعى ءوزى اتقارعان ساياساتتى جالعاستىرادى دەگەن دە بولجامدار بار.  ايتالىق، ەكونوميكادا سولتۇستىك كورەيامەن تىعىز بايلانىس ورناتۋى مۇمكىن. ونىڭ كەڭەسشىلەرىنىڭ ايتۋىنشا بۇل ساياساتتى «كۇن شۇعىلاسى ساياساتى II» دەپ اتاۋعا بولادى ەكەن. بۇل بۇرىنعى پرەزيدەنت پاك كىن حەنىڭ قاتاڭ ۇستانىمىنان باسقاشا ءارى ءىرى وزگەرىستەر الىپ كەلۋى مۇمكىن دەلىنۋدە. سونىمەن بىرگە ەگەر سايلاۋدا ءمۇن جاەن جەڭىسكە جەتەر بولسا، وڭتۇستىك كورەيا مەن اقش اراسى الىستاي ءتۇسۋى ىقتيمال.

ءمۇن جاەن ازىرگە دەيىن 40 پايىزدان استام سايلاۋشىلاردىڭ قولداۋىنا يە بولىپ كەلگەن. الايدا، سوڭعى بىرنەشە اپتادا  ونى قولداۋ كورسەتكىشتەرى تومەندەي باستاعانى بايقالادى. سەبەبى، پيوڭياڭ تارابىنىڭ كورسەتىپ وتىرعان مىنەز-قۇلقى سايلاۋشىلاردىڭ سولتۇستىكپەن تاتۋلىق كوزقاراسىنا سىزات سالۋدا.

"The Qazaq Times"