نەمىس كانتسلەرى باۆاريا پرەمەرىنىڭ كوڭىلىن تابۋ ءۇشىن پۋتينمەن كەزدەستى

بۇگىن رەسەي پرەزيدەنتى ۆلاديمير پۋتين سوچي قالاسىندا گەرمانيانىڭ فەدەرالدى كانتسلەرى انگەلا مەركەلمەن كەزدەسپەك. كرەمل ۇسىنعان مالىمەتتەرگە سۇيەنسەك، باسشىلار ەكى ەل اراسىنداعى قارىم-قاتىناستى، ياعني ەنەرگەتيكالىق، ساۋدا-ەكونوميكالىق ىنتىماقتاستىق ماسەلەلەرىن تالقىلايدى. بۇدان بولەك تاياۋ شىعىستا بولىپ جاتقان جاعدايلار مەن تەرروريزم جايىن جانە وسى جىلدىڭ شىلدە ايىندا گامبۋرگ قالاسىندا وتەتىن G20 ءسامميتى تۋرالى قىسقاشا ءسوز قوزعاماق.

 ايتا كەتەيىك، گەرمانيا كانتسلەرى سوڭعى رەت رەسەي ەلىنە 2015 جىلدىڭ 10 مامىرىندا كەلگەن. رەسەيدىڭ ەۋروپالىق وداقپەن، اسىرەسە گەرمانيامەن ساياسي جاعدايى 2013 جىلى ۋكرايناداعى داعدارىس باستالعان ساتتەن باستاپ ناشارلاي باستاعان. ال 2014 جىلى قىرىم رەسەيگە قوسىلعان سوڭ ەكى ەلدىڭ ءوزارا قاتىسى مۇلدە ۋشىعىپ كەتتى. مەركەل بولسا ۋكرايناداعى جاعدايعا ارالاسىپ، ونى بەيبىت تۇردە شەشۋگە تىرىسۋدا.

 Globaltimes.cn سايتىنىڭ مالىمەتىنشە، مەركەلدىڭ سوچيگە بۇگىنگى ساپارى دا وسى ماسەلەگە قاتىستى بولۋى مۇمكىن. ول سوچيگە كەلۋ ارقىلى بەيبىت كەلىسسوز جۇرگىزبەك. بىرنەشە اپتا بۇرىن ول وسىنداي ماقساتپەن ۋكراينا پرەزيدەنتى پەتر پوروشەنكومەن دە كەزدەسكەن.

بۇدان بولەك، مەركەل رەسەيگە كەلۋ ارقىلى اتالعان ەلگە سالىنعان ەۋروپالىق سانكتسيانى جەڭىلدەتۋگە بولاتىن-بولمايتىنىن شەشىپ العىسى كەلەتىن سياقتى. ەسكە سالا كەتسەك، 2016 جىلدىڭ 15 جەلتوقسانىندا ەۋروپالىق كەڭەس رەسەيگە قارسى سانكتسيا مەرزىمىن 31 شىلدەگە دەيىن ۇزارتقان. ەندى جاڭا شەشىم ماۋسىم ايىندا قابىلدانۋ كەرەك. دەگەنمەن ازىرگە سانكتسيانىڭ الىنۋىنا نەگىز بولاتىن ەشبىر بەلگى جوق.

نەمىس كانتسلەرىنىڭ رەسەيگە كەلۋىنە گەرمانياداعى باسقا دا ساياساتكەرلەردىڭ ىقپالى بولۋى مۇمكىن. سەبەبى باۆاريانىڭ پرەمەر-ءمينيسترى حورست زەەحوفەر سانكتسيا ساياساتىمەن كەلىسپەيتىنىن ايتقان جانە ول بۇل تۋرالى ناۋرىز ايىندا ماسكەۋگە ءىس-ساپارى بارىسىندا مالىمدەگەن. Financial Times اگەنتتىگى  باۆاريا پرەمەرىنىڭ رەسەيگە كەلۋىن «مەركەلدى ارنايى شاقىرۋ» دەپ باعالاعان. ال گەرمانيا كانتسلەرى فەدەرالدى سايلاۋ جاقىنداپ كەلە جاتقاندىقتان زەەحوفەردىڭ ارەكەتىنە توسقاۋىل بولا المايتىنى بەلگىلى.

سونداي-اق، كەيبىر باسىلىمدار مەركەل پۋتينمەن كەزدەسۋ ارقىلى حالىقارالىق ىستەردە رەسەيمەن قايتا ىنتىماقتاسۋ ءۇشىن ۇلكەن مۇمكىندىكتەردى قايتا قاراماق. ءتىپتى ماۋسىم ايىندا رەسەيگە قاتىستى سانكتسيا مەرزىمى ۇزارتىلعان كۇننىڭ وزىندە بۇگىنگى كەزدەسۋ مەركەلدىڭ قايتا گەرمانيا كانتسلەرى بولىپ سايلانۋىنا قولداۋ بولۋى مۇمكىن.

مارجان نۇسىپبەك

The Qazaq Times