Kollaj: QT

Bügin Resey Prezidenti Vladimir Putin Soçi qalasında Germaniyanıñ federaldı kancleri Angela Merkel'men kezdespek. Kreml' wsınğan mälimetterge süyensek, basşılar eki el arasındağı qarım-qatınastı, yağni energetikalıq, sauda-ekonomikalıq ıntımaqtastıq mäselelerin talqılaydı. Bwdan bölek Tayau Şığısta bolıp jatqan jağdaylar men terrorizm jayın jäne osı jıldıñ şilde ayında Gamburg qalasında ötetin G20 sammiti turalı qısqaşa söz qozğamaq.

 Ayta keteyik, Germaniya kancleri soñğı ret Resey eline 2015 jıldıñ 10 mamırında kelgen. Reseydiñ Europalıq odaqpen, äsirese Germaniyamen sayasi jağdayı 2013 jılı Ukrainadağı dağdarıs bastalğan sätten bastap naşarlay bastağan. Al 2014 jılı Qırım Reseyge qosılğan soñ eki eldiñ özara qatısı mülde uşığıp ketti. Merkel' bolsa Ukrainadağı jağdayğa aralasıp, onı beybit türde şeşuge tırısuda.

 Globaltimes.cn saytınıñ mälimetinşe, Merkel'diñ Soçige bügingi saparı da osı mäselege qatıstı boluı mümkin. Ol Soçige kelu arqılı beybit kelissöz jürgizbek. Birneşe apta bwrın ol osınday maqsatpen Ukraina Prezidenti Petr Poroşenkomen de kezdesken.

Bwdan bölek, Merkel' Reseyge kelu arqılı atalğan elge salınğan europalıq sankciyanı jeñildetuge bolatın-bolmaytının şeşip alğısı keletin siyaqtı. Eske sala ketsek, 2016 jıldıñ 15 jeltoqsanında Europalıq keñes Reseyge qarsı sankciya merzimin 31 şildege deyin wzartqan. Endi jaña şeşim mausım ayında qabıldanu kerek. Degenmen äzirge sankciyanıñ alınuına negiz bolatın eşbir belgi joq.

Nemis kancleriniñ Reseyge keluine Germaniyadağı basqa da sayasatkerlerdiñ ıqpalı boluı mümkin. Sebebi Bavariyanıñ prem'er-ministri Horst Zeehofer sankciya sayasatımen kelispeytinin aytqan jäne ol bwl turalı naurız ayında Mäskeuge is-saparı barısında mälimdegen. Financial Times agenttigi  Bavariya prem'eriniñ Reseyge keluin «Merkel'di arnayı şaqıru» dep bağalağan. Al Germaniya kancleri federaldı saylau jaqındap kele jatqandıqtan Zeehoferdiñ äreketine tosqauıl bola almaytını belgili.

Sonday-aq, keybir basılımdar Merkel' Putinmen kezdesu arqılı halıqaralıq isterde Reseymen qayta ıntımaqtasu üşin ülken mümkindikterdi qayta qaramaq. Tipti mausım ayında Reseyge qatıstı sankciya merzimi wzartılğan künniñ özinde bügingi kezdesu Merkel'diñ qayta Germaniya kancleri bolıp saylanuına qoldau boluı mümkin.

Marjan Nüsipbek

The Qazaq Times