فوتو: old.muftyat.kz

كوكتەمگى قار سۋىنىڭ ەرۋىنەن  وزەندەر ەرنەۋىنەن اسىپ، بىرقاتار وڭىرلەردەگى ەلدى مەكەندەر سۋ استىندا قالدى. تۇرعىندار ءۇي-جايىنان ايرىلىپ، تابيعي اپاتتىڭ سالدارىنان ءبىراز قيىندىققا تاپ بولدى. حالىققا گۋمانيتارلىق كومەك كورسەتۋ ماقساتىندا ەلىمىزدىڭ ءبىراز ايماقتارىندا قايىرىمدىلىق كەرۋەندەرى ۇيىمداستىرىلىپ جاتىر. 

وسىعان وراي، قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ەرجان قاجى مالعاجىۇلى حازىرەتتتىڭ تاپسىرماسىمەن سۋ تاسقىنىنان جاپا شەككەندەرگە كومەك كورسەتۋ ماقساتىندا «اقمولا اسارى» اتتى قايىرىمدىلىق كەرۋەنى ۇيىمداستىرىلعان بولاتىن. اتالمىش شاراعا كوكشەتاۋ قالاسى مەشىتتەرى مەن جەرگىلىكتى تۇرعىنداردان ازىق-تۇلىك، كيىم-كەشەك جانە قارجىلاي كومەك جينالدى. سونداي-اق مۇنداي يگى شاراعا سەمەي وڭىرىنەن 356 000 تەڭگە كولەمىندە قاراجاتپەن كومەك كورسەتىلىپ، جينالعان بارشا قاراجاتقا ازىق-تۇلىك الىندى. وبلىس يمامى قانات قىدىرمين باستاعان قايىرىمدىلىق كەرۋەنى وبلىستىڭ ساندىقتاۋ، اتباسار جانە استراحان اۋداندارىندا بولىپ، ءجۇز وتباسىنا ارنايى ازىق-تۇلىك پەن كيىم-كەشەكتەر تاراتىلدى.

فوتو: old.muftyat.kz

“The Qazaq Times”