Qañtar oqiğası kezinde qaza tapqan sarbaz ölimine kinäli dep tanılıp, 17 jılğa sottalğan qızılordalıq Qazıbek Qwdaybergenov öz-özine qol jwmsadı. Bwl jöninde Masa Media tilşisine onıñ jwbayı İñkärim Swltanova habarladı.  

Onıñ sözinşe, küyeui sot şeşimimen kelispey kurtkasınıñ zamogın wştap alıp, öz-özine qol jwmsamaq bolğan.  

– (Qazıbek Qwdaybergenov – red) sot şeşimimen kelispey öziniñ kiip jürgen kurtkasınıñ zamogın wştap alıp, moyının kesken. Qazir densaulığı jaqsı. №68 tergeu izolyatorınıñ äkimşiligine eşqanday arız-şağımı joq. Tek sot şeşimimen kelispeydi, – dedi ol.  

İñkärim Swltanovağa tergeu izolyatorınıñ därigerlik bölimi bergen anıqtamada Qazıbek Qwdaybergenovtıñ moyın twsında 5 sm jara bar ekeni aytılğan.  

– Terapevt därigerdiñ qabıldauında 11.01.22 jılğı sağat 12:30-da qarau barısında moyınında 5 sm köleminde kesilgen jaraqatı bar. Jaraqatına alğaşqı medicinalıq kömek körsetilip, jara ornı tañılıp, eki jerden jip salındı. Densaulığına arız-şağımı joq, jağdayı qanağattanarlıq, – dep jazılğan. 

 İñkärim Swltanovanıñ aytuınşa, küyeui öz-özine qol jwmsamaq bolğannan keyin tergeu izolyatorına prokuratura men wlttıq qauipsizdik komitetiniñ qızmetkerleri kelgen. Olar 19 qañtarda bolatın apellyaciyalıq sotta kömektesetinderin aytıp, mäseleni uşıqtırmay, tınış jabudı wsınğan. 

 – Prokuratura men WQK-dan adamdar kelgen. Olar «apellyaciyalıq sot kezinde kömek boladı, jılı ğana jauıp qoya salayıq» depti. Meniñ küyeuim «is qozğalsın, mağan anıqtama beriñder, barlığı resmi bolsın» degen. Anıqtamasın eki künnen keyin aldırtıp berdi. Qazir 105 bappen (öz-özin öltiruge deyin jetkizu) jaña is qozğap jatır. Biraq ol jaqtan eşqanday mälimet alğan joqpın äli, – dedi ol. 

 Qazıbek Qwdaybergenov sot Qañtar oqiğası kezinde Qızılorda qalasında qaza tapqan sarbaz Madiyar Qaysarovtıñ ölimine kinäli dep tanıp 17 jılğa bas bostandığınan ayırğan. Qwdaybergenovtıñ özi jäne tuıstarı sot şeşimimen kelispeydi.

 Qañtar oqiğası kezinde resmi derek boyınşa 238 adam qaza tapqan. On mıñğa juıq adam wstalıp, onıñ 70 payızı azaptalğan. Qazirgi uaqıtta «adam ölimi» men «azaptau» boyınşa isterdiñ basım köpşiligi toqtatılğan.