29 qaraşada Qızılorda sotı Qañtar oqiğası boyınşa ayıptalğan Qazıbek Qwdaybergenovti 17 jılğa bas bostandığınan ayırdı. Ol «jappay tärtipsizdikke qatısu» jäne «äskeri qızmetkerdiñ ölimine alıp kelgen qasaqana is-äreketke baru» baptarımen kinäli dep tanıldı. 

İñkärim Swltanova küyeuine tağılğan ayıppen kelispeydi. Onıñ sözinşe, Qazıbek Qwdaybergenovtiñ ayıbın däleldeytin eşqanday dälel joq.

– Meniñ joldasıma (Qazıbek Qwdaybergenovqa – red) Qañtar oqiğası kezinde qaytıs bolğan sarbaz Madiyar Qaysarovtıñ ölimine kinälap 17 jıl berdi. Men bwnı negizsiz, zañsız ayıp dep esepteymin. Jwbayımnıñ eşqanday kinäsi joq. Tergeu kezinde dälel retinde bir video körsetti. Biraq ol jerdegi adam meniñ küyeuim emes. Oğan eşqanday gabitologiyalıq saraptama jasalmağan. Videodağı adamnıñ türi körinbeydi. Kiimi wqsaydı deydi. Biraq ol kiimdi üyden zañsız alıp ketti. Küyeuimdi zañsız wstadı. Qart anamnıñ basına tapanşa tösedi. Ne zat, ne kiim alğandarın bizge körsetken joq. Ayıptau aktisinde körsetilgen ayıptar negizdelip, saralanıp qoyılmağan. Joldasım qılmıs bolğan jerde bolmağan. Onı telefonğa jasalğan bilingte körsetti, – deydi Qwdaybergenov.

İñkär Swltanova tergeu kezinde Qazıbek Qwdaybergenovti 20 kün boyı wrıp-soğıp, qwjattarğa qol qoydırıp alğan. Ol tağılğan ayıptardıñ barlığın moyındağan.

– Säken Mwhiddin degen tergeuşi 20 kün boyı wrıp-soğu arasında qwjattardıñ barlığına qol qoydırğan. Küyeuim ölip qalmasam eken, üyime aman-esen jeteyin dep barlığına qol qoyıp bergen. Onıñ işinde ayıptau aktisinde jazılğandardıñ barlığın moyındağan. Tipti anau şetelde otırğan Mwhtar Äbilyazovtiñ DVK qozğalısın da qosıp qoyğan. «Ekstremistik wyımnıñ qılmıstıq äreketterin sol kisiniñ aytuımen jasadı» dep jazıp qoyğan. Küyeuimnen «Mwhtar Äbilyazovti bilesiñ be?» dep swrağanımda ol mağan «joq birinşi ret estip twrmın» dedi. Men ol adamnıñ kim ekenin keyin internetten kördim, – deydi ol.

Qañtardıñ 9-ı küni wstalıp, sol uaqıttan beri qamauda otırğan 34 jastağı Qazıbek Qwdaybergenovtiñ sotı Qızılorda qalasınıñ 2 sotında 25 mamırda bastalğan. 29 qaraşada sud'ya Duman Äliev Qwdaybergenovti kinäli dep tanıp, 17 jılğa bas bostandığınan ayırğan. Prokuror B Sariev sottaluşığa 20 jıl türme jazasın berudi swrağan.

Sot Qañtar oqiğası kezinde Qızılorda qalasında qaza tapqan Wlttıq wlan sarbazı Madiyar Qaysarovtıñ ölimine Qazıbek Qwdaybergenovtiñ qatısı bar dep tanıdı. Sottaluşınıñ özi tağılğan ayıptı moyındamaydı.

Resmi derek boyınşa, Qañtar oqiğası kezinde Qızılorda qalasında 26 adam mert bolğan. Onıñ bireui mindetti äskeri borışın ötep jürgen sarbaz. Bwğan deyin qwqıq qorğauşı Baqıtjan Töreğojina qaza tapqandardıñ 25 adamnıñ ärqaysısına «adam öltiru», «jappay tärtipsizdikke qatısu», «ğimarattarğa şabuıl jasau» baptarı boyınşa is qozğalğanın aytqan.

Qazaqstan boyınşa Qañtar oqiğası kezinde 238 adam qaza tapqan. Onıñ altauı qamauda azaptaudan mert bolğan. Halıqaralıq wyımdar men qwqıq qorğauşılar Qazaqstan biligin oqiğanıñ jay-japsarın anıqtau üşin şeteldik sarapşılardıñ qatısuımen zertteuge şaqırğan. Biraq prezident Qasım-Jomart Toqaev «öz küşimiz de jetedi» dep ol wsınıstı qabıldamadı. Qañtar oqiğasınıñ bolğanına 11 ay boldı. Äli künge deyin oğan sayasi-qwqıqtıq bağa berilgen joq.