29 قاراشادا قىزىلوردا سوتى قاڭتار وقيعاسى بويىنشا ايىپتالعان قازىبەك قۇدايبەرگەنوۆتى 17 جىلعا باس بوستاندىعىنان ايىردى. ول «جاپپاي تارتىپسىزدىككە قاتىسۋ» جانە «اسكەري قىزمەتكەردىڭ ولىمىنە الىپ كەلگەن قاساقانا ءىس-ارەكەتكە بارۋ» باپتارىمەن كىنالى دەپ تانىلدى. 

ىڭكارىم سۇلتانوۆا كۇيەۋىنە تاعىلعان ايىپپەن كەلىسپەيدى. ونىڭ سوزىنشە، قازىبەك قۇدايبەرگەنوۆتىڭ ايىبىن دالەلدەيتىن ەشقانداي دالەل جوق.

– مەنىڭ جولداسىما (قازىبەك قۇدايبەرگەنوۆقا – رەد) قاڭتار وقيعاسى كەزىندە قايتىس بولعان سارباز ماديار قايساروۆتىڭ ولىمىنە كىنالاپ 17 جىل بەردى. مەن بۇنى نەگىزسىز، زاڭسىز ايىپ دەپ ەسەپتەيمىن. جۇبايىمنىڭ ەشقانداي كىناسى جوق. تەرگەۋ كەزىندە دالەل رەتىندە ءبىر ۆيدەو كورسەتتى. بىراق ول جەردەگى ادام مەنىڭ كۇيەۋىم ەمەس. وعان ەشقانداي گابيتولوگيالىق ساراپتاما جاسالماعان. ۆيدەوداعى ادامنىڭ ءتۇرى كورىنبەيدى. كيىمى ۇقسايدى دەيدى. بىراق ول كيىمدى ۇيدەن زاڭسىز الىپ كەتتى. كۇيەۋىمدى زاڭسىز ۇستادى. قارت انامنىڭ باسىنا تاپانشا توسەدى. نە زات، نە كيىم العاندارىن بىزگە كورسەتكەن جوق. ايىپتاۋ اكتىسىندە كورسەتىلگەن ايىپتار نەگىزدەلىپ، سارالانىپ قويىلماعان. جولداسىم قىلمىس بولعان جەردە بولماعان. ونى تەلەفونعا جاسالعان بيلينگتە كورسەتتى، – دەيدى قۇدايبەرگەنوۆ.

ىڭكار سۇلتانوۆا تەرگەۋ كەزىندە قازىبەك قۇدايبەرگەنوۆتى 20 كۇن بويى ۇرىپ-سوعىپ، قۇجاتتارعا قول قويدىرىپ العان. ول تاعىلعان ايىپتاردىڭ بارلىعىن مويىنداعان.

– ساكەن مۇحيددين دەگەن تەرگەۋشى 20 كۇن بويى ۇرىپ-سوعۋ اراسىندا قۇجاتتاردىڭ بارلىعىنا قول قويدىرعان. كۇيەۋىم ءولىپ قالماسام ەكەن، ۇيىمە امان-ەسەن جەتەيىن دەپ بارلىعىنا قول قويىپ بەرگەن. ونىڭ ىشىندە ايىپتاۋ اكتىسىندە جازىلعانداردىڭ بارلىعىن مويىنداعان. ءتىپتى اناۋ شەتەلدە وتىرعان مۇحتار ءابىليازوۆتىڭ دۆك قوزعالىسىن دا قوسىپ قويعان. «ەكسترەميستىك ۇيىمنىڭ قىلمىستىق ارەكەتتەرىن سول كىسىنىڭ ايتۋىمەن جاسادى» دەپ جازىپ قويعان. كۇيەۋىمنەن «مۇحتار ءابىليازوۆتى بىلەسىڭ بە؟» دەپ سۇراعانىمدا ول ماعان «جوق ءبىرىنشى رەت ەستىپ تۇرمىن» دەدى. مەن ول ادامنىڭ كىم ەكەنىن كەيىن ينتەرنەتتەن كوردىم، – دەيدى ول.

قاڭتاردىڭ 9-ى كۇنى ۇستالىپ، سول ۋاقىتتان بەرى قاماۋدا وتىرعان 34 جاستاعى قازىبەك قۇدايبەرگەنوۆتىڭ سوتى قىزىلوردا قالاسىنىڭ 2 سوتىندا 25 مامىردا باستالعان. 29 قاراشادا سۋديا دۋمان اليەۆ قۇدايبەرگەنوۆتى كىنالى دەپ تانىپ، 17 جىلعا باس بوستاندىعىنان ايىرعان. پروكۋرور ب ساريەۆ سوتتالۋشىعا 20 جىل تۇرمە جازاسىن بەرۋدى سۇراعان.

سوت قاڭتار وقيعاسى كەزىندە قىزىلوردا قالاسىندا قازا تاپقان ۇلتتىق ۇلان ساربازى ماديار قايساروۆتىڭ ولىمىنە قازىبەك قۇدايبەرگەنوۆتىڭ قاتىسى بار دەپ تانىدى. سوتتالۋشىنىڭ ءوزى تاعىلعان ايىپتى مويىندامايدى.

رەسمي دەرەك بويىنشا، قاڭتار وقيعاسى كەزىندە قىزىلوردا قالاسىندا 26 ادام مەرت بولعان. ونىڭ بىرەۋى مىندەتتى اسكەري بورىشىن وتەپ جۇرگەن سارباز. بۇعان دەيىن قۇقىق قورعاۋشى باقىتجان تورەعوجينا قازا تاپقانداردىڭ 25 ادامنىڭ ارقايسىسىنا «ادام ءولتىرۋ»، «جاپپاي تارتىپسىزدىككە قاتىسۋ»، «عيماراتتارعا شابۋىل جاساۋ» باپتارى بويىنشا ءىس قوزعالعانىن ايتقان.

قازاقستان بويىنشا قاڭتار وقيعاسى كەزىندە 238 ادام قازا تاپقان. ونىڭ التاۋى قاماۋدا ازاپتاۋدان مەرت بولعان. حالىقارالىق ۇيىمدار مەن قۇقىق قورعاۋشىلار قازاقستان بيلىگىن وقيعانىڭ جاي-جاپسارىن انىقتاۋ ءۇشىن شەتەلدىك ساراپشىلاردىڭ قاتىسۋىمەن زەرتتەۋگە شاقىرعان. بىراق پرەزيدەنت قاسىم-جومارت توقاەۆ «ءوز كۇشىمىز دە جەتەدى» دەپ ول ۇسىنىستى قابىلدامادى. قاڭتار وقيعاسىنىڭ بولعانىنا 11 اي بولدى. ءالى كۇنگە دەيىن وعان ساياسي-قۇقىقتىق باعا بەرىلگەن جوق.