Bügin 15 qırküyekte Jetisu oblısı, Taldıqorğan qalasında sudiya Bekmwrat Düysenbekov "Qañtar qırğını" kezinde qamalğandardı türli joldarmen ayausız azaptağan policeylerdiñ sot procesin ötkizdi.

Sotta 23 jäbirlenuşiniñ arız-şağımı boyınşa kriminaldıq policiya basqarmasınıñ 3 qızmetkeri, äkimşilik policiya basqarmasınıñ bir inspektorı jäne arnayı jasaqtıñ bir qızmetkeri jalpı 5 küdiktiniñ isi qaralıp jatır.

Qañtar qırğınında policeylerdiñ qolın artına qayırıp arqasına qalay ütik basqanın aytıp bergen Diren Aytov osındağı küdiktilerden de basqa policiya qızmetkerleriniñ bar ekendigin, biraq olardıñ äli jauapqa tartılmağanın ayttı.

"Meni işki ister departamenti ğimaratınıñ artqı esiginen kirgizdi de, 5-qabatqa köterdi. Joğarı köterilmes bwrın kimde qaru bar ekenin swradı. "5-qabatqa barğanda öziñe qiın boladı" dep ayttı. Bilmeytinimdi ayttım. Sodan keyin joğarı qabatqa köterildim. Ol jerde dälizde adamdardı qaz-qatar jatqızıp qoyğan. Betperde kigenderi bar, qolında qaruı bar. Adamdardıñ basına sekirip, üstinen jügirip jür. Sol uaqıtta aldımnan Aydın Kenjebaev (küdikti) pen Dias Ramazanov (küdikti) kezdesti. Kenjebaev rezinka dubinkamen basımnan 6-7 ret wrdı...  Dias Ramazanov degen jigit qolımdı artqa qayırıp kisen saldı. Jerge jatqızıp, basımdı ayağımen basıp twrdı. Eki ayağımdı kimniñ basıp twrğanın bilmeymin. Aydın Kenjebaev ütikti qızdırıp otırdı. Sodan "dwrıstap wstap twrıñdar" dedi de, ıstıq ütikpen işimnen bastı. 2-3 ret bastı. Esimnen tanıp qaldım. Dias Ramazanov şaşımnan wstap köterdi, Kenjebaev ütiktiñ buın betime bastı, Kenjebaevtan da basqa azaptağandardı da jauapqa tartıñız. Sol üşin isti qayta tergeuge jiberiñiz,  - dedi Aytov.

Sud'ya Düysenbekov isti qayta tergeuge jiberu-jibermeu mäselesin talqılau üşin aldın ala tıñdau ötkizuge şeşim qabıldap kelesi sot otırısın 30 qırküyekke qaltırdı.

Taldıqorğan qalası

Ä. Adayhan