Säuir ayınıñ 13 jwldızında Əl-Farabi atındağı Qazaq Wlttıq universitetiniñ Əl-Farabi ğılımi kitaphanasında «Mağripa Jılqıbaeva - Altın adamnıñ kümis zerenşedegi 26 tañbasınıñ qwpiyasın aşqan ğalım» dep atalatın döñgelek üstel-konferenciya ötti. JOO men ğılımi instituttardıñ professor-oqıtuşıları qatısqan alqalı jiında ğalımnıñ «Altın adamnıñ amanatı», «Altın adamnıñ mwrası» jäne «Qwpiya küşter qwdireti» dep atalatın kitaptarı turalı bayandamalar jasaldı.

Mağripa Jılqıbaeva - kvanttıq fizika arqılı älemde twñğış ret Esik qorğandağı Altın adam mwrası boyınşa proto däuirdegi alğaşqı adamzat tiliniñ rasşifrovkasın jasağan jaratılıstanuşı ğalım. Altın adamdardıñ Planetalıq deñgeydegi erekşeligin zertteu arqılı Saq qorğandar men Kök Türik piramidalarınıñ qwpiyasın aşqan qazaqtan şıqqan twñğış oqımıstı.

Esik qorğanınan tabılğan Altın adam jazuların zertteuşiler bwğan deyin de bolğan. Biraq kümis zerenşege bederlengen 26 tañbanıñ älemdik deñgeydegi mañızı zor mwra ekendigin ğılımi twrğıda däleldegen ğalım bireu. Ol – Mağripa Jılqıbaeva. Altın adam tañbaların 30 jıl zerttep, qwpiyasın fizika-matematikalıq ädispen aşqan älemdegi twñğış fizik. Şaranı jürgizgen qalamger Bolat Şarahımbay osı turalı keñinen tolğadı.

Esik qorğanınan tabılğan Altın adamnıñ qwpiyasın aşu üşin ğalım otız jıl uaqıtın sarp etkendigin, adamzat balası üşin asa qwndı mälimetterdiñ bärin Altın adamnıñ janınan şıqqan kümis zerenşedegi jazudan alğanın, köne jazudıñ sırın aşuda mwnşama köp ğılımi täsilderdi bir ortağa jwmıldırıp zertteu amaldarı oğan deyin bir de bir ret täjiribeden ötpegendigin atap ayttı. «Mağripa Jılqıbaeva jazudıñ qwpiyasın fizikalıq-matematikalıq ädispen tereñ zerttep, oqığan älemdegi twñğış ğalım bolatını sol sebepten» dedi Bolat Jwmınwlı.

 

Jiında ğalım eñbekterin bilim beru ürdisine engizu mäseleleri de talqılandı. Tarih päniniñ mwğalimi Aziza Oñğarbaeva Jambıl atındağı orta mektebinde aşılğan Mağripa Jılqıbaeva atındağı ğılımi muzeyi ayasında jürgizilgen tanımdıq is-şaralardıñ jwmısı turalı bayandama jasadı. 2020 jıldıñ 15 qazan küni aşılğan muzey-kabinette ğalımnıñ kitaptarı, twtınğan jeke zattarı qoyılğan. Juırda Mağripa Şöjeğwlqızınıñ düniege kelgen künine oray 5-10 sınıp oquşıları arasında «Altın adam mwrasın arqalağan ğalım» dep atalatın konferenciya ötkizildi. Sonday-aq osı mekteptiñ oquşıları Mağripa Jılqıbaevanıñ zertteu eñbekteriniñ tarihi mañızı» taqırıbı ayasında oblıstıq, respublikalıq olimpiada, bayqaularğa qatısuda.  Juırda oquşılarğa arnap «Altın adamnıñ amanatın arqalağan – Mağripa Şöjeğwlqızı» degen taqırıpta döñgelek üstel wyımdastırılğan.

Mağripa Jılqıbaeva – Älemde twñğış ret ejelgi däuirden jetken qwpiya jazu ülgilerin, tañbalardı keñistik boyınşa oqudıñ ədisin tapqan zertteuşi. Petroglifterdi, köne zaman jädigerlerindegi şifrlı jazulardı kvanttıq optikanıñ kömegimen oqu ədisi – Mağripa Jılqıbaevanıñ ədisi bolıp tabıladı. 1989 jıldan ömiriniñ soñına deyin Altın adamnıñ kümis zerenşesindegi 26 tañbasın optika ilimi arqılı zertteumen aynalısqan ğalım elimizdegi jäne şet elderdegi 1000-nan astam jartas jazularınıñ, köne kalligrafiyalıq suretterdiñ de şifrın aşqan.

Jiında söz alğan «Esik» memlekettik tarihi-mädeni muzey-qorığınıñ ağa ğılımi qızmetkeri Aytqwl Hamit artına mol mwra qaldırğan Mağripa Jılqıbaeva eñbekteriniñ elimiz üşin erekşe ekendigin atap ötti. Sonday-aq professor Gülziya Pirälieva (M.Äuezov atındağı Ädebiet jäne öner institutı), A.Baytwrsınov atındağı Til bilimi institutınıñ ğılımi qızmetkeri, filologiya ğılımdarınıñ kandidatı Güljihan Köbdenova  Altın adam mwrasına ömirin arnağan ğalım eñbekteriniñ ğılımi mañızdılığına toqtaldı. «Qazaqstan däuiri» gazetiniñ bas redaktorı Ertay Ayğaliwlı kezinde Mağripa Şöjeğwlqızımen kezdeskende estigen tarihi-tanımdıq äñgimelerin eske alıp, estelikterimen bölisti. Qalamger Kädirbek Qwnıpiyawlı el-jer tarihın tanuda ğalım eñbekterin zerdelep oqu qajettigin ayttı. Şara barısında Mağripa Şöjeğwlqızınıñ ğılımi mwrasına arnalğan körme ötkizildi.

Almatı qalası

Qalamqas Bisenğaliqızı