Separatisttik Lugansk Reseyge qosılu boyınşa referendum ötkizui mümkin ekenin ayttı. Foto: BBC

Lugansk separatistik aymağında Reseyge qosılu boyınşa referendu ötui mümkin. Bwl turalı sol aymaqtağı Resey qoldaytın separatistik küşter mälimdedi. Resmi Kiev bwnday referendumnıñ eşqanday zañdıq negizi joq ekenin eskertti.

Özin «Luganks Halıq Respublikası» dep atağan aymaqtıñ basşısı sanalğan Leonid Paseçnik jeksenbide Reseyge qosılu boyınşa referendum ötetini turalı mälimdedi. Bwl turalı «Reyter» agenttigi habarlağan edi.

Resey äskeri Ukraina jerine basıp kiruden üş kün bwrın Vladimir Putin Lugansk pen Doneckti derbes memleket dep moyındaytın resmi şeşimge qol qoydı. Kiev bwnı Reseydiñ atalmış aymaqtardı jaulap aludıñ bir qadamı retinde körsetti, Mäskeu şeşimine qarsı halıqaralıq reakciya da küşti boldı. Al, Ukraina biligi Lugansk pen Doneck aymaqtarın Reseydiñ annekciyalauına eşqaşan könbeytinin aytıp keledi. Taraptar arasındağı kelissözdiñ de eñ kürdeli äri qayşılıqtı tüyini de osı.

Ukraina SİM tarabı atalmış referendumğa qarsı jauabında: «Uaqıtşa basıp alınğan aumaqtardağı barlıq jalğan referendumdar tükke twrğısız, jaramsız jäne eşqanday zañdılıqqa ie bolmaydı. Onıñ ornına Resey halıqaralıq qauımdastıq tarapınan bwdan da auır qauip-qaterlerge tap boladı. Bwl qadam onıñ onıñ halıqaralıq oqşaulanuın odan äri tereñdetui mümkin», – degen.

Türiktiñ «Anadolı» agenttigi bwl jönindegi arnayı habarında Reseydiñ keybir sayasatkerleri de bwnday referendumdı qolday bermeytinin aytqan. Aytalıq, Resey Mem. dumasınıñ TMD isteri jönindegi komitetiniñ basşısı Kalaşnikov: «Meniñ oyımşa, qazir bwnı isteytin uaqıt emes», – degen.

Köptegen sarapşılar Lugansk nemese Doneck aymağınıñ Reseyge qosılu boyınşa referendum ötkize bastauı soğıstı boldırmau, beybit kelissözge keldegi bolmaşı ümitti joq qılıp, jağday şeşilmeytin şieleniske qaray damidı dep sanaydı. Reseydi oqşaulau qadamı odan sayın artıp, nätijesinde älem men Reseydiñ bitimgerşilik mümkindikteri azaya tüsedi deytin közqarastar aytadı.

The Qazaq Times