سەپاراتيستتىك لۋگانسك رەسەيگە قوسىلۋ بويىنشا رەفەرەندۋم وتكىزۋى مۇمكىن ەكەنىن ايتتى. فوتو: BBC

لۋگانسك سەپاراتيستىك ايماعىندا رەسەيگە قوسىلۋ بويىنشا رەفەرەندۋ ءوتۋى مۇمكىن. بۇل تۋرالى سول ايماقتاعى رەسەي قولدايتىن سەپاراتيستىك كۇشتەر مالىمدەدى. رەسمي كيەۆ بۇنداي رەفەرەندۋمنىڭ ەشقانداي زاڭدىق نەگىزى جوق ەكەنىن ەسكەرتتى.

ءوزىن «لۋگانكس حالىق رەسپۋبليكاسى» دەپ اتاعان ايماقتىڭ باسشىسى سانالعان لەونيد پاسەچنيك جەكسەنبىدە رەسەيگە قوسىلۋ بويىنشا رەفەرەندۋم وتەتىنى تۋرالى مالىمدەدى. بۇل تۋرالى «رەيتەر» اگەنتتىگى حابارلاعان ەدى.

رەسەي اسكەرى ۋكراينا جەرىنە باسىپ كىرۋدەن ءۇش كۇن بۇرىن ۆلاديمير پۋتين لۋگانسك پەن دونەتسكتى دەربەس مەملەكەت دەپ مويىندايتىن رەسمي شەشىمگە قول قويدى. كيەۆ بۇنى رەسەيدىڭ اتالمىش ايماقتاردى جاۋلاپ الۋدىڭ ءبىر قادامى رەتىندە كورسەتتى، ماسكەۋ شەشىمىنە قارسى حالىقارالىق رەاكتسيا دا كۇشتى بولدى. ال، ۋكراينا بيلىگى لۋگانسك پەن دونەتسك ايماقتارىن رەسەيدىڭ اننەكتسيالاۋىنا ەشقاشان كونبەيتىنىن ايتىپ كەلەدى. تاراپتار اراسىنداعى كەلىسسوزدىڭ دە ەڭ كۇردەلى ءارى قايشىلىقتى ءتۇيىنى دە وسى.

ۋكراينا ءسىم تارابى اتالمىش رەفەرەندۋمعا قارسى جاۋابىندا: «ۋاقىتشا باسىپ الىنعان اۋماقتارداعى بارلىق جالعان رەفەرەندۋمدار تۇككە تۇرعىسىز، جارامسىز جانە ەشقانداي زاڭدىلىققا يە بولمايدى. ونىڭ ورنىنا رەسەي حالىقارالىق قاۋىمداستىق تاراپىنان بۇدان دا اۋىر قاۋىپ-قاتەرلەرگە تاپ بولادى. بۇل قادام ونىڭ ونىڭ حالىقارالىق وقشاۋلانۋىن ودان ءارى تەرەڭدەتۋى مۇمكىن»، – دەگەن.

تۇرىكتىڭ «انادولى» اگەنتتىگى بۇل جونىندەگى ارنايى حابارىندا رەسەيدىڭ كەيبىر ساياساتكەرلەرى دە بۇنداي رەفەرەندۋمدى قولداي بەرمەيتىنىن ايتقان. ايتالىق، رەسەي مەم. دۋماسىنىڭ تمد ىستەرى جونىندەگى كوميتەتىنىڭ باسشىسى كالاشنيكوۆ: «مەنىڭ ويىمشا، قازىر بۇنى ىستەيتىن ۋاقىت ەمەس»، – دەگەن.

كوپتەگەن ساراپشىلار لۋگانسك نەمەسە دونەتسك ايماعىنىڭ رەسەيگە قوسىلۋ بويىنشا رەفەرەندۋم وتكىزە باستاۋى سوعىستى بولدىرماۋ، بەيبىت كەلىسسوزگە كەلدەگى بولماشى ءۇمىتتى جوق قىلىپ، جاعداي شەشىلمەيتىن شيەلەنىسكە قاراي داميدى دەپ سانايدى. رەسەيدى وقشاۋلاۋ قادامى ودان سايىن ارتىپ، ناتيجەسىندە الەم مەن رەسەيدىڭ بىتىمگەرشىلىك مۇمكىندىكتەرى ازايا تۇسەدى دەيتىن كوزقاراستار ايتادى.

The Qazaq Times