Irannan köşip kelgen qazaqtar. Aqtau, 15 qırküyek 2021 jıl. Foto: inform.kz

Keşe, 15 qırküyek küni Qazaqstanğa Irannan 53 wltı qazaq azamat köşip keldi. Bwl turalı Mañğıstau oblısı äkimdiginiñ baspasöz qızmeti habarladı.

"Iran islam respublikasınıñ Gorgan qalasınan 53 adam Qazaqstanğa qonıs audardı. Olar Aqtau qalasında 2-3 kün ayaldap, qwjattarın retteydi. Jataqhanağa ornalastıramız. Qwjattarın retteu jwmıstarı ayaqtalğannan soñ Nwr-Swltan qalasına attanadı. Keyin köşi-qon bağdarlaması arqılı Soltüstik Qazaqstan öñirine qonıstanadı" dedi Aqtau qalası äkiminiñ orınbasarı Äbilqayır Baypaqov.

Aqparatqa qarağanda, Qazaqstanğa barlığı 20 otbası kelgen.

Resmi mälimet boyınşa, Iranda şamamen üş mıñnan astam qazaq twradı.

Bir apta bwrın Qazaqstan ükimeti biligi "Taliban" qozğalısınıñ qolına ötken Auğanstannan 35 qazaqtı elge köşirip äkelgen edi.

The Qazaq Times