يراننان كوشىپ كەلگەن قازاقتار. اقتاۋ، 15 قىركۇيەك 2021 جىل. فوتو: inform.kz

كەشە، 15 قىركۇيەك كۇنى قازاقستانعا يراننان 53 ۇلتى قازاق ازامات كوشىپ كەلدى. بۇل تۋرالى ماڭعىستاۋ وبلىسى اكىمدىگىنىڭ ءباسپاسوز قىزمەتى حابارلادى.

"يران يسلام رەسپۋبليكاسىنىڭ گورگان قالاسىنان 53 ادام قازاقستانعا قونىس اۋداردى. ولار اقتاۋ قالاسىندا 2-3 كۇن ايالداپ، قۇجاتتارىن رەتتەيدى. جاتاقحاناعا ورنالاستىرامىز. قۇجاتتارىن رەتتەۋ جۇمىستارى اياقتالعاننان سوڭ نۇر-سۇلتان قالاسىنا اتتانادى. كەيىن كوشى-قون باعدارلاماسى ارقىلى سولتۇستىك قازاقستان وڭىرىنە قونىستانادى" دەدى اقتاۋ قالاسى اكىمىنىڭ ورىنباسارى ابىلقايىر بايپاقوۆ.

اقپاراتقا قاراعاندا، قازاقستانعا بارلىعى 20 وتباسى كەلگەن.

رەسمي مالىمەت بويىنشا، يراندا شامامەن ءۇش مىڭنان استام قازاق تۇرادى.

ءبىر اپتا بۇرىن قازاقستان ۇكىمەتى بيلىگى "تاليبان" قوزعالىسىنىڭ قولىنا وتكەن اۋعانستاننان 35 قازاقتى ەلگە كوشىرىپ اكەلگەن ەدى.

The Qazaq Times