Foto: teletype.in

Özbekstan prezidenti Şavkat Mirziyaev 11 tamızda "Vatandoşlar" qoğamdıq qorın qwru turalı jarlıqqa qol qoydı. dep habarladı Ortalıq Aziya jañalıqtar qızmeti.

Resmi mälimetke qarağanda, qordıñ maqsatı - "şetelde twratın otandastardı tarihi otanı töñiregine biriktiru, olardıñ jüreginde elge degen maqtanış sezimin nığaytu, wlttıq erekşelikti saqtau, otandastar men olar qwrğan türli bilestikterdi qoldau".

Qordıñ negizgi bağıttarı da ayqındaldı. Qoğamdıq qor şetelde twratın otandastardıñ qoğamdıq birlestikterimen äriptestik baylanıs ornatadı, onı nığaytadı; şetelde twratın otandastardıñ qwqıqtarı men erkindigin qorğauğa kömektesedi; şetelde qiın jağdayda qalğan otandastarğa materialdıq jäne äleumettik kömek körsetedi; özbek tilin, mädenieti men dästürin şetelde damıtuğa jäne saqtauğa qolğabıs etedi; şetelde twratın darındı otandastarğa jağday jasaydı.

"Vatandoşlar" qoğamdıq qorınıñ joğarğı organı retinde qamqorlıq keñesi bekitilgen. Jergilikti aqparat qwraldarınıñ habarlauınşa, bwl keñesti Özbekstannıñ halıq ärtisi Şeräli Juraev basqaradı, onıñ orınbasarı qızmetin belgili töreşi Ravşan Irmatov atqaradı.

Qordı qwruğa qajetti 5 mlrd sum ($470 mıñ) ükimettiñ rezerv qorınan bölinedi.

Mälimetterge qarağanda, qor Özbekstannan şığıp, älemniñ jüzden astam elinde ornıqqan 10 millionnan astam özbekke, sonımen birge olardıñ 170-ten astam mädeni ortalıqtarına qoldau körsetedi.

The Qazaq Times