S5+1 dialogı Auğanstan taqırıbın talqıladı. Foto: QR SİM.

Bügin, 15 şildede, AQŞ jäne Orta Aziya elderi sırtqı sayasi vedomstvo basşılarınıñ qatısqan S5+1 formatındağı kezdesu Taşkentte ötti. Kezekti otırısqa qazaq, özbek, täjik jäne türkimen elderiniñ SİM jetekşileri, Qırğızstannıñ Özbekstandağı elşisi jäne AQŞ prezidentiniñ wlttıq qauipsizdik jönindegi keñesşisiniñ orınbasarı qatısqan. Bwl turalı QR SİM resmi saytı mälimdedi.  

Otırıstıñ bastı taqırıbı Auğanstan mäselesi bolğanı aytpasa da tüsinikti. Oğan qosımşa pandemiyadan zardap şekken ekonomikanı qalpına keltiru boyınşa birlesken küş-jiger taqırıptarın talqılağan.

Täşkenttegi bas qosu.

Sırtqı ister ministrimiz Mwhtar Tileuberdi öz kezeginde S5+1 dialogın damıtudıñ, bioqauipsizdik, sauda-investiciyalıq ıntımaqtastıq jäne energetika salasındağı ıntımaqtastıqtı tereñdetudiñ, adam saudasına qarsı ortaq küresti jandandırudıñ, adam kapitalın damıtu boyınşa istestikterdiñ mañızdı ekenin ataptı.

QR SİM jetekşisi M.Tileuberdi şara ayasında prezident Jo Baydenniñ wlttıq qauipsizdik jönindegi keñesşisiniñ orınbasarı Elizabet  Şervud-Rendall bastap kelgen amerikalıq delegaciya qwramımen ekijaqtı kezdesu ötkizgen.

M.Tileuberdi AQŞ delegaciyası qwramında Baydenniñ wlttıq qauipsizdik jönindegi keñesşisiniñ orınbasarı Elizabet Şervud-Rendall jäne AQŞ-tıñ Auğanstan boyınşa bwrınğı ökili Halid Zalmaymen kezdesip twr.

Qazirgi Auğanstandağı jağdaydıñ özgerisi men damuınan alıp qarağanda S5+1 formatındağı dialogtıñ atalğan mäseleni bastı taqırıp etui zañdılıq. Auğanstannan äskerin şığarıp jatqan Qwrama Ştattar aymaqtağı äskeri mümkindikterin Ortalıq Aziyada saqtap qalğısı keletini belgili. Bwl maqsatta Uaşington Özbekstanğa köbirek ümit artıp otırğanı da anıq bola tüsti.

QR SİM jetekşisi M.Tileuberdi Täşkentte.

Kezdesu barısında taraptar qanday kelisimder men uädelerge keliskeni QR SİM mälimetinde anıq aytılmağan. Degenmen, atalğan dialog formatı Uaşingtonnıñ aymaqtağı ıqpalın arttıruğa bağıttalğan negizgi jobası bolğandıqtan, aldağı uaqıtta aymaq geostrategiyalıq damuına oray bwl jobanıñ mañızdılığı arta tüspek.

“The Qazaq Times”