Änşi Säken Mayğaziev.

Şımkent äkimdiginiñ Naurız toyına bölgen qarajatı jaylı video tüsirgen belsendi Arujan Düysebaevanı Qılmıstıq kodekstiñ "Qorlau" babı boyınşa sotqa bergen Şımkent qalalıq mädeniet üyiniñ direktorı, änşi Säken Mayğaziev şetelde demalısta jür, al onıñ advokatı Ayjan Nwrlıqwlova "The Qazaq Times" tilşisiniñ swrağına jauap beruden bas tarttı.

– Şağım tüsirdik. Kimniñ känäli, kimniñ kinäsiz ekendigin sot anıqtaydı. Men eşqanday pikir ayta almaymın, – dedi änşiniñ advokatı Nwrlıqwlova jeke nömirine habarlasqan tilşige.

Mwnan keyin biz Säken Mayğazievtiñ özine de habarlastıq. Şarapat esimdi kömekşisi änşiniñ qazir şetelde demalısta jürgenin ayttı. Biz Mayğazievke qoyğımız kelgen swraqtardı kömekşisiniñ WhatSapp nömerine joldadıq. Ol änşige jetkizetinin ayttı. Alayda äli jauap bergen joq.

Mayğaziev Düysebaevadan ne talap etip otır?

Qoğamda Mayğaziev basqaratın mädeniet üyiniñ Naurız merekesin ötkizuge 595 mln teñge bölgeni qızu talqılanıp jatqanda Arujan Düysebaeva tirkelmegen "Dempartiyanıñ" Youtube video jelisindegi resmi arnasında "Säken Mayğaziev Şımkentte qanşa aqşa tonadı?" degen taqırıpta video jariyalağan. Ol atalğan videoda Mayğaziev basqaratın mekemeniñ Şımkettegi Naurız toyına jartı mlrd teñgeden astam qarjı bölgenin sınap, änşini "jemqor" dep atağan. Düysebaeva beynejazbasında jurnalister men memlekettik satıp alu salasın zertteuşi mamandar keltirgen derekterdi negizge alğan.

"Demokratiyalı Qazaqstan" Youtube arnasında jariyalanğan Arujan Düysebaevanıñ Säken Mayğaziev jaylı videosı. 

Ayıptau şağımına qarağanda, Mayğaziev joğarıdağı videoda özine qarata aytılğan "jemqor", "Qazaqstandı tonap jatır, öltirip jatır", degen sözder "ar-namısımdı, qadir-qasietimdi, bedelimdi qorladı" dep şağım tüsirgen. Ol ayıptaluşı Düysebaevadan atalğan videonı internetten öşirip, özinen jariya türde keşirim swrauın talap etip otır. Bwğan qosa, Mayğaziev Düysebaevanıñ Qılımıstıq kodekstiñ 131-babı, 2-tarmağı boyınşa jauapqa tartılğanın qalaydı. (Atalğan baptıñ ükimi: Eki jüz aylıq eseptik körsetkişke deyingi mölşerde ayıppwl saluğa ne sol mölşerde tüzeu jwmıstarına ne bir jüz seksen sağatqa deyingi merzimge qoğamdıq jwmıstarğa tartuğa jazalanadı)

Ayıptaluşı taraptıñ aytqanı

Bügin, 14 şildede arnayı baspasöz mäslihatın ötkizgen Arujan Düysebaeva men onıñ jaqtastarı (tirkelmegen "Dempartiya" belsendileri) Mayğaziev şağımınıñ "sayasi astarı bar" dedi. Olardıñ sözinşe, änşini bilik "opppoziciyağa qarsı qolşoqpar" retinde paydalanıp otır.

"Säken Mayğaziev özi bölgen qarjığa baylanıstı naqtı esep berui kerek. Birde-bir swraqqa jauap bermey, qanşama uaqıt ötkennen keyin, qanşama naqtı dälel keltirgen jurnalisterdi sotqa bermey, meni sotqa bergendigin sayasi tapsırıs dep bilemin. Sebebi aldındağı mitingter bar, keşegi 6 şildedegi miting bar, solardıñ bärinde bizdiñ Demokratiyalıq partiya belsendilerine öte qattı qısım körsetti. Keybirin wrıp-soqtı, keybirin qamadı. Meniñ özim de eki märte miting kezinde omandardan tayaq jep, auruhanağa jetkizildim. Mwnıñ bäri bizdiñ sağımızdı sındıru üşin jasalıp jatqan äreketter dep bilemin. Äytpese, qanşa uaqıt ötken soñ sotqa berui... Säken Mayğaziev tüs kördi me, bilmeymin" dedi Düysebaeva.

Bwğan qosa, ol 14 şildedegi baspasöz jiınında özine tağılğan ayıptarmen kelispeytinin de jetkizdi.

"Eger Mayğazievtiñ şınımen arı taza bolsa, jemqorlıqqa qatısım joq dese, nege halıqtıñ aldına şığıp, öziniñ wstanımın aytpaydı? Mına qarjı mınağan ketti, mınağan jwmsaldı dep nege tüsindirmeydi. Ol nege egov saytındağı qwjattardı joqqa şığaradı? Jurnalister, zertteuşiler barlığı naqtı faktimen körsetti emes pe" dedi belsendi.

Şımkenttegi Naurız toyınıñ jay-japsarı

Üş jarım ay bwrın memlekettik satıp alu portalındağı resmi derekterdi negizge alğan jurnalister men belsendiler änşi Säken Mayğaziev basqaratın Şımkent qalalıq mädeniet üyiniñ Naurızğa arnalğan is-şaralarğa 595 mln teñge qarjı bölgenin anıqtağan. Sol kezde bwl oqiğa qoğamda ülken şu tudırğan edi. Jurnalister zertteuinde Şımkent qalalıq mädeniet üyiniñ Naurızğa oray jasasqan kelisimşarttarda tehnikalıq erekşelikterdi dwrıs toltırmağanı aytılğan. Bwğan qosa, osı mäseleni kötergen belsendiler is-şaralarğa bölingen qarjı tım köp ekendigine jäne tenderdi täjiribesi joq kompaniyalardıñ wtqanına basa nazar audarğan.

Şımkent qalası äkiminiñ birinşi orınbasarı Şıñğıs Mwqan men Şımkent qalalıq mädeniet üyiniñ direktorı Säken Mayğaziev

Mäsele qoğamda qızu talqılanıp jatqanda Säken Mayğaziev te, Şımkent qalası äkiminiñ birinşi orınbasarı Şıñğıs Mwqan da jurnalister keltirgen derekti joqqa şığardı. Olar "Naurızğa tek 213  mln teñge bölingenin, jurnalister keltirgen 595 mln teñge jıl boyı ötetin is-şaralarğa qarastırılğanın" uäj etti. Biraq olardıñ bwl mälimeti memlekettik satıp alu portalındağı resmi derekke qayşı boldı. Öytkeni Mayğaziev basqaratın mädeniet üyi türli kompaniyalarmen jasasqan 7 kelisimşartta da is-şaralardıñ Naurız merekesine oray ekeni anıq jazılğan.

24 mausımda Ortalıq kommunikaciyalar qızmetinde ötken brifingte "Qazaqtayms" tilşisiniñ swrağına jauap bergen Şımkent qalasınıñ äkimi Mwrat Äytenov te 595 mln teñge tek Naurız toylauğa emes, jıl boyı ötetin is-şaralarğa da qarastırılğanın ayttı. Onıñ sözinşe, memlekettik satıp alu portalındağı 595 mln teñgege jasalğan kelisimşarttıñ bärinde Naurız merekesi dep jazılıp twruına "mekeme qızmetkeriniñ qateligi sebep" bolğan.

Äytenovtıñ "Naurızğa 213 mln teñge bölindi, 595 mln teñge jıl boyı ötetin is-şaralar üşin qarastırılğan" degeni memlekettik satıp alu portalındağı resmi derekke qayşı. Öytkeni Şımkent qalalıq mädeniet üyiniñ jıl bastalğalı merekelik is-şaralar üşin jasasqan kelisimşarttarınıñ jalpı qwnı qazirdiñ özinde 680 mln teñgeden asıp ketti. Memlekettik satıp alu portalındağı mälimetke qarğanda, Şımkent äkimdigi merekelik is-şaralarğa 2021 jılı 800 mln teñgeden astam qarajat jwmsaudı josparlap otır.

"The Qazaq Times"