Medbike emhananıñ egu bölimine vakcinanıñ kezekti tranşın termosömkemen alıp bara jatır. Almatı qalası. Säuir 2021 jıl. Foto: QT / Kültegin Aspanwlı

Densaulıq saqtau ministrliginiñ mälimetinşe, Qazaqstanda vakcinanıñ alğaşqı dozasın alğan 1,5 mln adamnıñ şamamen 0,02%-ına virus jwqqan.

5 mamır, särsenbide ministr Aleksey Coydıñ qatısuımen OrtKomda ötken brifingte ekpeniñ birinşi dozası 1 mln 487 qazaqstandıqqa egilgeni jäne onıñ şamamen 300-deyi auırğanı habarlandı. Resmi mälimetke säykes, 400,7 mıñ adam eki dozanı tolıq alğan.

«Jalpılay aytqanda, jalpıhalıqtıq vakcinaciya nauqanı belsendi jürip jatqanına kuä bolıp otırmız. Jwrttıñ ekpege senimi arttı. Vakcina alğan 1,5 mln adamnıñ şamamen 0,02%-ına (şamamen 300 adam) ğana virus jwqqan. Bwl vakcinanıñ tiimdi ekenin, jemisin ayqın körsetedi», – dedi Aleksey Coy.

Azattıq radiosınıñ habarlauınşa, ministrlik aqparat qwralına bergen jauabında 29 säuir küngi mälimet boyınşa elde vakcinanıñ eki dozasın alğandar arasında 31 adamğa virus jwqqan dep mälimdegen.

Bıltırğı naurızdan beri kovidten auırğandar sanı 385 mıñnan (332 mıñ koronavirus, 53 mıñ osığan wqsas pnevmoniya) asqan. Degenmen Ükimet koronavirus pen onıñ pnevmoniyasın eki bölek esepteydi. Pandemiya bastalğalı jalpı virus jwqqandardıñ 6232-si (KVI+ / U07.1 – 3796, KVI- / U07.2 – 817, ilespe aurulardan – 1619) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi.

Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 47-orında twr.

"The Qazaq Times"