Batıs aqparat qwraldarı Qırımdağı jäne Ukrain-Resey şekarasındağı qılt etken özgeristi qalt etkizbey qarap otır. Keşe ğana BBC, AIPS jäne Agence France-Presse aqparat agenttikteri Qırım men Qara teñizdegi reseylik äsker men äskeri tehnikalardıñ tağı da köbeyip jatqanın jazdı. Habarlarda tübek şığısında jaña äskeri lager payda bolğanı da aytıldı. Bwl EO, AQŞ jäne NATO-nıñ mazasın tipti de qaşıra tüsti.

Habarğa qarağanda, Resey Qara teñizge bwl aymaqtağı äskeri küşterine tän emes kemelerdi de kirgizgen. Mäskeu bolğan jağdaydı qalıptı äskeri jattığu degennen tanbay otır. Qazir Qırım men Qara teñizdiñ keybir keñistikteri wşuğa uaqıtşa tıyım salınğan aymaqqa aynaldı.

Resey annekciyalap alğan Qırımdağı qazirgi äskeri jattığulardı Batıs sarapşıları Keñes odağı ıdırağannan keyingi eñ auqımdı äskeri jattığu dep bağalap otır. Degenmen, köpşilik sarapşılar Reseydiñ bwl äskeri äreketi Ukrainağa qarsı qoldanılmaydı dep sanaydı. Bar bolğanı Kievtiñ biligin iliktirip, endi bir jağınan NATO-nıñ Ukraina üşin qanşalıqtı qoldau körsete alatının körsetkisi keledi degen boljamdar aytıladı.

Ärine, Mäskeu biligi de qazir aşıq soğısqa kiruge därmensiz. Eldiñ ekonomikalıq jağday, öndiris quatı sekildi soğıs tağdırın şeşetin mañızdı faktorlarda Reseydiñ buını bos twrğanın köp jwrt biledi. Onıñ üstine AQŞ-tıñ jaña sankciya dauılı aldağı uaqıtta memleket byudjetin ortaytıp, qarulı küşterdiñ şığının öteudiñ özi qiınğa tüseri kütilip otır. Degenmen, aymaqtağı jäne oğan jaqın elderdi soğıstıñ kütpegen oqiğalardan twtanıp ketu mümkindigi alañdatadı. Bwnday qırauar äsker men äskeri tehnika toptalğan aymaqtı qızuı az ğana jetpey twrğan jarılğış zat dese bolatınday. Säl ğana şaşırağan wşqın joyqın quattı jarılğıştı otaldırıp jiberui de mümkin. Onday jağdayda taraptar öziniñ älsizdigin körsetpes üşin aşıq soğısqa ötuden basqa şarası qalmay qaladı.

Degenmen, bir osı mäsele boyınşa Batıstıñ da wstanım-pikirleri böline tüskendey. NATO-nıñ Europadağı müşeleri şır-pır bolıp qauip dabılın qaqsa, Britan men AQŞ salqınqandılıq tanıtqanday boldı. Tipti, Reseydiñ äskeri belsendiligine qaramastan jaña sankciyalar paketin de aşıp saldı. Osınıñ bäri Reseydiñ Ukraina mañındağı äskeri belsendiligi «basıp aludan» köri sayasi oyındardıñ jürisine köbirek wqsağanın körsetti.

“The Qazaq Times”