HMS Queen Elizabeth tasımaldauşısı

Ukraina men Resey arasındağı şieleniske baylanıstı Wlıbritaniya mamırda eki äskeri kemesin Qara teñizge jiberedi. Bwl turalı Sunday Times habarladı.

Bwğan deyin AQŞ şielenisti azaytu üşin mwnday josparlardan bas tartqan bolatın. Uaşington men Europa elderi Ukrainamen şekaralas aymaqtarğa Resey äskeri küşteriniñ ornalasqanına alañdauşılıq bildirip otır. Bwl jağday jöninde resmi London men onıñ odaqtastarı «Ukrainanıñ egemendigi men aumaqtıq twtastığın» qoldaytının ayttı.

Resey Ukrainamen qarım-qatınası uşıqqan twsta Qara teñizde äskeri-teñiz flotınıñ bir böligin wstap otır. Mäskeudiñ aytuınşa, onda qazir äskeri jattığular ötip jatır. Resey äskeri jattığuğa siltep Kerç' bwğazın şeteldik kemeler üşin jauıp tastadı. Ukraina kemeleri de osı bwğazdı paydalanatın. Al Kiev Reseydiñ bwl şeşimin zañsız dep sanaydı.

Zenittik zımırandarmen qarulanğan 45 tipti eki joyğış keme jäne 23 tipti süñguir qayıqqa qarsı fregat biraz uaqıtqa Jerorta teñizindegi Korol'dik äskeri-teñiz flotınıñ tasımaldauşı tobınan şığıp, Bosfor arqılı Qara teñizge bet aladı.

Toptıñ flagmandıq kemesi – HMS Queen Elizabeth tasımaldauşısı Bosfordan öte almaydı. Onıñ bortında F-35 joyğış bombalauşıları men Merlin tikwşaqtarı bar. Wlıbritaniya Qorğanıs ministrliginiñ ökili britan ükimeti Ukrainamen tığız jwmıs istep jatqanın jäne Reseyden şielenisti bäseñdetudi talap etetinin ayttı.

"The Qazaq Times"