ۋكراينانى قولداۋ: ۇلىبريتانيا قارا تەڭىزگە اسكەري كەمە جىبەرەدى

ۋكراينا مەن رەسەي اراسىنداعى شيەلەنىسكە بايلانىستى ۇلىبريتانيا مامىردا ەكى اسكەري كەمەسىن قارا تەڭىزگە جىبەرەدى. بۇل تۋرالى Sunday Times حابارلادى.

بۇعان دەيىن اقش شيەلەنىستى ازايتۋ ءۇشىن مۇنداي جوسپارلاردان باس تارتقان بولاتىن. ۋاشينگتون مەن ەۋروپا ەلدەرى ۋكراينامەن شەكارالاس ايماقتارعا رەسەي اسكەري كۇشتەرىنىڭ ورنالاسقانىنا الاڭداۋشىلىق ءبىلدىرىپ وتىر. بۇل جاعداي جونىندە رەسمي لوندون مەن ونىڭ وداقتاستارى «ۋكراينانىڭ ەگەمەندىگى مەن اۋماقتىق تۇتاستىعىن» قولدايتىنىن ايتتى.

رەسەي ۋكراينامەن قارىم-قاتىناسى ۋشىققان تۇستا قارا تەڭىزدە اسكەري-تەڭىز فلوتىنىڭ ءبىر بولىگىن ۇستاپ وتىر. ماسكەۋدىڭ ايتۋىنشا، وندا قازىر اسكەري جاتتىعۋلار ءوتىپ جاتىر. رەسەي اسكەري جاتتىعۋعا سىلتەپ كەرچ بۇعازىن شەتەلدىك كەمەلەر ءۇشىن جاۋىپ تاستادى. ۋكراينا كەمەلەرى دە وسى بۇعازدى پايدالاناتىن. ال كيەۆ رەسەيدىڭ بۇل شەشىمىن زاڭسىز دەپ سانايدى.

زەنيتتىك زىمىراندارمەن قارۋلانعان 45 ءتيپتى ەكى جويعىش كەمە جانە 23 ءتيپتى سۇڭگۋىر قايىققا قارسى فرەگات ءبىراز ۋاقىتقا جەرورتا تەڭىزىندەگى كورولدىك اسكەري-تەڭىز فلوتىنىڭ تاسىمالداۋشى توبىنان شىعىپ، بوسفور ارقىلى قارا تەڭىزگە بەت الادى.

توپتىڭ فلاگماندىق كەمەسى – HMS Queen Elizabeth تاسىمالداۋشىسى بوسفوردان وتە المايدى. ونىڭ بورتىندا F-35 جويعىش بومبالاۋشىلارى مەن Merlin تىكۇشاقتارى بار. ۇلىبريتانيا قورعانىس مينيسترلىگىنىڭ وكىلى بريتان ۇكىمەتى ۋكراينامەن تىعىز جۇمىس ىستەپ جاتقانىن جانە رەسەيدەن شيەلەنىستى باسەڭدەتۋدى تالاپ ەتەتىنىن ايتتى.

"The Qazaq Times"