Foto: cdni.rt.com

Ukrainada pandemiyanıñ üşinşi tolqını bastalıp, virus jwqtırğandardıñ sanı täuligine 15 mıñ adamğa deyin jetti. Qazir eldiñ 5 oblısı koronavirustıñ taraluı boyınşa qauipti «qızıl» deñgeyde twr. Al emhanalardağı tösek orındarınıñ 70%-dan astamı nauqasqa tolı.

Osığan baylanıstı karantin şaraları qatañdatıla bastadı. Apta basında qabıldanğan Ukraina ükimetiniñ qaulısı boyınşa şet elderden otanına oralğan el azamattarı da soñğı 48 sağatta jasalğan arnayı testti şekara qızmetkerlerine körsetui tiis. Olay bolmağan küzde sayahatşılar 14 kün boyı oqşaulanuı mindetteledi. Sonımen qatar, el ükimeti Kiev qalasındağı ministrlik jäne basqa da atqaruşı organ qızmetkerlerine 9 säuirge deyin tolığımen onlayn formattağı jwmısqa köşuge şaqırdı.

Koronavirusqa qatıstı jağdaydıñ uşığuın Ukrainanıñ densaulıq saqtau ministrligi britandıq ştamnıñ kesirimen baylanıstıradı. Densaulıq saqtau ministriniñ resmi mälimetinşe, elde adam ölimine qatıstı statistika jañarğan: bir täulikte dertten qaytıs bolğandar sanı alğaş ret 300 adamnan astı. Arğı aptada virus jwqtırğandar 60 748 bolsa, ötken aptada bwl san 86 708 adamğa jetken.

Ukrainada virusqa qarsı vakcinaciya 24 aqpanda bastalğan. Koronavirustıñ jıldam örşuine baylanıstı, täuligine 10 mıñ adam memleketten tegin ekpe alıp jatır. Büginge deyin 121 mıñnan astam adam koronavirusqa qarsı ekpeniñ alğaşqı dozasın qabıldadı. Al 1 naurızdan bastap elde tegin vakcina aluğa tirkelu bastaldı.

"The Qazaq Times"