Fotokollaj: www.5.ua
  • Siz Putindi qanişer dep esepteysiz be?
  • Iä!

Baydenniñ AVS telearnasındağı osı swhbatınan keyin Resey Vaşingtondağı elşisi Anatoliy Antonovtı eki el sayasatın talqılau üşin Mäskeuge qaytardı. Bwl turalı SİM ökili Mariya Zaharova habarladı.

«Biz üşin eñ bastısı – Vaşington men Mäskeu arasındağı degradaciyağa ketken sayasattı qalpına keltiru. Taraptar diplomatiyalıq qarım-qatınastıñ bolaşağın naqtılauı tiis», – dedi Zaharova.

Swhbatta Mäskeudiñ 2020 jılı AQŞ-tağı prezident saylauına aralasqanı jaylı bayandağan amerikalıq barlau qızmetiniñ esebi söz bolğan. Bayden eger Reseydiñ saylauğa aralasqanı rastalsa, onıñ artı jaqsılıqqa aparmaydı dep Putinge eskertu jasadı.

Aq üy basşısınıñ swhbatı men sankciyalardan keyin reseylik akciyalar narığı, rubl' qwldıradı. Dollar bağamı 1,13 rubl'ge, euro bağamı - 1,33 rubl'ge, 88,08 rubl'ge deyin ösken. Resey Memlekettik Dumasınıñ törağası Vyaçeslav Volodin öziniñ Telegram paraqşasında: «Baydenniñ bügingi mälimdemesi aqılğa sıymaydı. Demek, demokratiyalıq principter men moral'dı birinşi rölge qoyatın memlekettiñ basşısı özin wstay almaydı degen söz. Bizdiñ memleket basşımız turalı mwnday pikir aytuğa eşkimniñ qwqığı joq. Bayden öz mälimdemesimen elimizdiñ azamattarın qorladı. Putin – bizdiñ prezident, oğan jasalğan şabuıl – bizdiñ elge jasalğan şabuıl!», – dep jazğan.

Aq üydiñ baspasöz hatşısı Djennifer Psaki 17 naurızda «Resey öziniñ äreketi üşin jauap beredi» dep mälimdedi. Bwğan deyin AQŞ barlau qızmeti arnayı bayandamasında Mäskeu 2020 jılı AQŞ-tağı prezident saylauına aralastı degen twjırım jasağan.

18 naurızda AQŞ Sauda departamenti Sergey Skripal' men YUliya Skripal' jäne Aleksey Naval'nıydıñ ulanuına baylanıstı Reseymen sauda-sattıqta jaña şekteulerdi qatayttı. Oğan säykes, AQŞ wlttıq qauipsizdikke qatısı bar tauarlar men tehnologiyasın Reseyge eksporttaudı toqtatadı. Mäsele qorğanıs salasında qoldanılatın önimder men türli maqsatta qoldanıluı mümkin tauarlar jöninde bolıp otır. Sonıñ saldarınan Reseydiñ aviaciya jäne ğarış salası iri mäselege kezigui mümkin. Jaña sauda şekteuleri büginnen bastap küşine enedi.

Skripal'dar otbası ulanğannan keyin Amerika biligi himiyalıq qaruğa tıyım salu turalı 1991 jılı qabıldanğan zañ ayasında eki sankciya salğan. Naval'nıydıñ ulanuına baylanıstı bıltır tamız ayında jäne biıl naurız ayında soğan wqsas şaralar qoldanıldı. Qara tizimge birqatar jeke jäne zañdı twlğalar engen, arasında reseylik ğılımi instituttar da bar.

Seysenbide AQŞ-tıñ Wlttıq barlau qızmetiniñ qwpiya esebi jariyalandı. Bayandamada Putin Djo Baydenniñ bedelin tüsiru turalı bwyrıqa bergeni jazılğan. Sonımen qatar, avtorlar: «2020 jılı birde-bir şeteldik derjava Reseydiñ siyaqtı saylauğa äser etu maqsatında keñ auqımdı nauqan jürgizuge tırıspadı. Al Resey demokratiyalıq partiyanıñ elektrondıq poştasına hakerlik şabuıl jasap, äleumettik jelilerde feyk habar tarattı», – deydi.

Öz kezeginde Vaşingtondağı Resey elşiligi de, Kreml' de amerikalıq barlau qızmetiniñ esebin «negizsiz jäne däleldenbegen aqparat» ekenin ayttı. Putinniñ baspasöz hatşısı Dmitriy Peskov bwl jöninde: «Biz bwl bayandama qorıtındısımen kelispeymiz. Resey 2020 jılğı saylauğa aralasqan joq. Kandidattardıñ saylau nauqanına da qatısqan joq. Sol sebepti bwl esep negiziz», – dep mälimdedi.

"The Qazaq Times"