Qırğızstan mke Qazaqstan prezidentteri. Foto: ehonews.kz

Qasım-Jomart Toqaev Qırğızstan prezidenti Sadır Japarovpen telefon arqılı söylesip, Qazaqstanğa resmi issapar barısın talqıladı.

Toqaev Japarovtı Qırğızstan prezidenti lauazımına saylanuımen qwttıqtadı. Taraptar dostıqqa, tatu körşilikke jäne strategiyalıq äriptestikke qwrılğan qazaq-qırğız qatınastarınıñ beriktigin naqtılap, ekijaqtı ıqpaldastıqtı jaña deñgeyge köteru maqsatında birlesuge dayın ekenin ayttı. Sonımen qatar, qırğız prezidenti özine Nazarbaevtıñ qwttıqtau hat jibergeni üşin alğıs bildirdi.

Bwğan deyin Japarov memleket basşısı retinde alğaşqı saparı Qazaqstannan bastalatının aytqan. Biraq birinşi kezekte Reseyge baratını belgili boldı.

28 qañtarda Qırğızstanda jaña prezidenttiñ inauguraciyası ötken bolatın. Şarağa Qazaqstannan qazirgi emes, bwrınğı prezident Nwrswltan Nazarbaev şaqırılğan. Alayda Nazarbaevtıñ özi şarada boy körsetpedi. Onıñ qwttıqtau hatın räsim kezinde Qazaqstan halıqtarı assambleyası törağasınıñ orınbasarı Janseyit Tüymebaev oqıdı.

Bıltır qazannıñ basında Qırğızstanda parlamenttik saylau nätijelerine qarsı jappay narazılıq akciyaları bastaldı. 6 qazanğa qarağan tüni Japarov jazasın ötep jatqan Şu oblısındağı koloniyadan öz jaqtastarımen bosatıldı. Sol küni Qırğızstannıñ Joğarğı sotı onıñ ükimin joydı.

14 qazanda Parlament deputattarı Sadır Japarovtı Qırğızstannıñ prem'er-ministri etip bekitti. Prezident Sooronbay Jeenbekov Ükimettiñ jaña qwramın tağayındau turalı Jarlıqqa qol qoydı. Kabinettiñ bwrınğı basşısı Kubatbek Boronov respublikadağı işki sayasi jağdaydıñ uşığuına baylanıstı öz erkimen qızmetinen ketti.

15 qazanda prezident Sooronbay Jeenbekov oppoziciyanıñ qısımımen otstavkağa ketti. Konstituciyağa säykes, jaña saylau ötkizilgenge deyin memleket basşısınıñ mindetterin parlament spikeri atqaruı tiis edi. Alayda spiker Qanatbek Isaev prezidenttiñ ökilettigin prem'er-ministr Sadır Japarovqa berdi.

"The Qazaq Times"