Almatı qalasında koronavirus pen koronavirus pnevmoniyası qayta artıp jatqanı bayqaladı. Körneki suret. Foto: aşıq derekköz

Qazaqstanda 20 qaraşa 822 adamnan koronavirus, al beysenbide 154 adamnan koronavirus pnevmoniyası anıqtaldı. Qazirgi tañda 21 mıñnan astam (KVI+ 10 838, KVI- 10 617) adam auırıp jatır. Aqmola, BQO, Qostanay, Pavlodar, SQO oblıstarında virus jwqqanı PTR arqılı rastalğandardıñ öskeni bayqaladı. Qaraşa ayınıñ jiırma küninde tirkelgen 15 mıñnan astam nauqas pen 150 şaqtı ölim jağdayı qısqı tolqınğa dayındıqtı pısıqtauğa sebep boluı tiis. 

#Koronavirus Keşe, qaraşanıñ 20-ı koronavirus jwqtırğan 412 adam ayığıp şıqsa, 7 adam ömirden ötken. Jañadan tirkelgen nauqastardıñ eñ köbi –  ŞQO (227) jäne Pavlodar (95), SQO (87), Almatı qalası (84).

Bir ayğa juıq nauqastar sanı boyınşa alda kele jatqan Şığıs Qazaqstan oblısındağı epidemiyalıq ahual uşığıp, öñir tolıqtay oqşaulanğan. Degenmen memlekettik bas sanitar Erlan Qiyasov pen öñird äkim Danial Ahmetov «jağday baqılauda jäne qalıptı» dep sanaydı. Öñir (14 mıñ) virus jwqtırğandar boyınşa Almatı qalası (15,5 mıñ) jäne astanadan (15,5 mıñ) keyingi üştikte twr. Jergilikti atqaruşı bilik ökilderi mwnıñ sebebin sanitarlıq talaptardıñ tiisinşe saqtalmauımen jäne şekaralıq aymaq boluımen baylanıstıradı. Halqı jağınan özge aymaqtarğa qarağanda aytarlıqtay az ŞQO-dağı jwqtırğandar sanı qaraşa ayı bastalğalı 4,8 mıñnan astı.

Ekinşi qatarda Pavlodar (1118), keyin Qostanay (983) oblıstarı ornalasqan. Äzirge jağday twraqtı öñirler – Qızılorda (18), Mañğıstau (19), Türkistan (36) oblıstarı. Mwnıñ barlığı qaraşa ayındağı resmi jiıntıq esep boyınşa.

Epidemiya jağdayınıñ deñgeyine baylanıstı Pavlodar, Qostanay, Şığıs jäne Batıs oblıstarı qızıl, astana, Almatı qalası men Aqmola oblısı sarı, qalğan öñirler jasıl aumaqqa engizilgeni habarlandı.

DenMin-niñ resmi mälimetinşe, emdelip jatqan 10,8 mıñnan astam nauqastıñ 3127-si auruhanada. Tağı 7711 adam ambulatorlıq terapiyada. Olardıñ arasında 511 bala emdelip jatır.

Ahualı naşar 224 nauqastıñ arasında 24 adamnıñ jağdayı qattı qiındağan. Jäne 23 sırqat ökpeni jasandı jeldetu apparatımen tınıstap jatır.

Respublika boyınşa barlığı 124 mıñnan astam adam koronavirus infekciyasın jwqtırsa, emdelip jazılğandarı – 111,8 mıñğa tayağan. Bwl jalpı nauqastardıñ 95%-dan astamı. Qazan ayınıñ alğaşqı aptasınan bastap elde koronavirus qayta köbeygen.

#Koronavirus_pnevmoniyası Sonımen qosa, koronavirus pnevmoniyasına şaldıqqan 154 adam tirkelgen. Tağı 91 adam ayığıp şıqqan, bir kisi qaytıs bolğan. Bwl diagnoz boyınşa da ŞQO (69) men Pavlodar (15) oblıstarı, Almatı qalasında (9) bastapqı orındarda twr. Pnevmoniyağa şaldıqqan 41 mıñday adamnıñ 30 mıñğa juığı jazılıp şıqqan.

DDSW tuıstas derttiñ qaupi birdey ekenine basa nazar audarsa da Qazaqstannıñ Densaulıq saqtau ministrligi koronavirus pen onıñ pnevmoniyalıq türine eki türli közqaraspen qaraydı. Onıñ anıq däleli – KVI+ turalı aqparattıq indikatorlar (aymaqtarğa taraluı, nauqastardıñ ahualı, onıñ işindegi stacionar men ambulatorlıq baqılaudağılar sanı, balalar sanı, ÖJJA-men tınıstap jatqandar, ayıqqandar, jaña keyster, qaytqandar) kündelikti jariyalansa, al KVI- deregi soñğı üş körsetkişten özge mälimet berilmeydi. Qazir koronavirus pnevmoniyasınıñ aymaqtarğa taraluı jönindegi deregi ministr äu basta aytqanday kündelikti ne aptasına emes, endi on künde bir-aq beriledi. Onıñ özinde qwjat formatında saytqa jükteledi, vedomstvo resurstarında aşıq äri tüsinikti tilde jariyalanbaydı.

Qoğamda biılğı 256 mıñ pnevmoniya jağdayın esepke qospay, jalpı statistikanı şildedegi qırğınnan keyin jürgize bastağan Ükimettiñ esebine kümänmen qaraytındar köbeygen.

#Söytse... Qazaqstanda koronavirus ölimi azaymay twr. Qaraşa ayında 15 332 adam auırğan jäne 148 adam qaytıs bolğan. Bwl qazan ayında tirkelgen tolıq jiıntıqtan da köp. Resmi derekke säykes, ötken ayda 9,5 mıñday qazaqstandıq auırğan (4439 adam KVI+, 4984 adam KVI-) jäne 165 adam ömirden ötken (118 adam KVI+, 47 adam KVI-). 

Osılayşa jazğı tolqınnıñ şarıqtau şeginen keyingi tamız ayınan beri Qazaqstanda dert jwqtırıp auırğandar 75 mıñnan asqan. Üş jarım ayda indetten 1,4 mıñday adam ömirden ötken.

Pnevmoniyanıñ koronavirustan basqa türlerine şaldıqqandar sanı 358 mıñğa jaqındadı. Jiıntıq esebi, 13 naurızdan beri COVID-19 infekciyasın jwqtırğandar qatarı 124 mıñnan, 1 tamızdan bergi koronavirus pnevmoniyası 41 mıñnan asqan. DDSW mälimetinşe, Qazaqstanda auırğandardıñ sanı 165 mıñğa jaqındağan. Degenmen Ükimet koronavirus pen onıñ pnevmoniyasın eki bölek esepteydi. Pandemiya bastalğalı jalpı virus jwqqandardıñ 3111-i (KVI+ / U07.1 – 1977, KVI- / U07.2 – 425, ilespe aurulardan – 709) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 709 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

"The Qazaq Times"