Söz ben istegi qayşılıq: Uädesinde twrmağan «Nwr Otan»

«Nwr Otan» partiyası 2021 jılğa qaray jüzege asırıluı tiis birqatar saylaualdı uädelerin orındağan joq. Bwl turalı Mäjilistiñ baspasöz qızmeti habarladı.

Ükimettiñ «Qazaqstan-2021: Birlik. Twraqtılıq. Jasampazdıq» dep atalğan keybir mindettemeler tolıq kölemde orındalmağan. Mısalı, narıqtı otandıq azıq-tülikpen, 250 adamnan twratın barlıq eldi mekenderdi joğarı jıldamdıqtı internetpen qamtamasız etu, memlekettik jäne kvazimemlekettik sektordıñ iri kompaniyaların jekeşelendiru sındı josparlar «ädettegidey» söz küyinde qalğan.

Mäjilis törağası Nwrlan Nığmatulin: «Pandemiya, älemdik narıqtardağı twraqsızdıq – eskerilui tiis mäseleler. Biraq biz Ükimettiñ bwl mäselelerdi şeşude naqtı tetikteri men tüsinikteri bar ekenin körip otırmız. Ükimet alğa qoyılğan maqsattarğa qol jetkizu üşin barlıq qajetti küş-jiger men qwraldardı osı bağıttarğa şoğırlandıradı dep oylaymın. Parlament öz tarapınan baqılaudı qamtamasız etudi jalğastıradı», – deydi.

Qazir bwl partiya aldağı saylauğa qızu dayındıq bastağan. OSK-nıñ 5 qaraşadağı şeşimine say, Qazaqstannıñ eks-prezidenti, prezidenttikten ketse de bilikke ıqpal etip otırğan Nwrswltan Nazarbaevtıñ «Nwr Otan» partiyası, bilikke jaqın «Aqjol», «Auıl», «Birlik», «Qazaqstannıñ kommunistik partiyası» jäne özderin oppoziciyalıq partiyamız deytin «Jalpıwlttıq social-demokratiyalıq partiya» saylauğa qatısa aladı.

Biz söz etip otırğan mäjilis pen maslihat saylauın qazirgi prezident Toqaev 10 qañtarğa belgilegen. Bwl – eldi otız jılğa juıq basqarğan bwrınğı prezident Nwrswltan Nazarbaevtıñ otstavkasınan keyin alğaş ret ötetin mäjilis saylauı bolmaq. 1995 jılı jaña Konstituciya qabıldanğalı ünemi kezekten tıs ötip kelgen saylau bwl jolı zañda belgilengen merziminde ötpek. Elde mäjilis pen mäslihat bes jılğa saylanadı.

Elde bıltırdan beri bilikke sın aytıp, sayasi reforma talap etip jürgen birneşe bastamaşıl top pen sayasi wyımdar partiya bolıp tirkelip, parlament saylauına qatısudı josparlağan. Biraq olar türli sebeppen saylauğa deyin tirkele almadı. Eki ayday qalğan saylauğa deyin qanday da bir wyım jaña partiya bolıp tirkelui ekitalay. Qazaqstan zañı boyınşa, sayasi partiya bolıp tirkelu üşin 20 mıñ müşesi boluı şart, mıñdağan adam qatısqan qwrıltay ötkizip, är aymaqta filial aşıp, ädilet ministrligine qwjat tapsıruı tiis.

Caylauğa deyin partiya tirkegisi kelgen belsendiler «bilik özine qarsı şığatın sayasi küşterdi saylauğa jibermedi, resmi tirkeuden ötkizbedi», «10 qañtarda ötirik äri öli saylau boladı» dep sanaydı.

Ayta keteyik, 1999 jılı merziminen bwrın ötken prezident saylauınan keyin kandidat Nwrswltan Nazarbaevtıñ saylau ştabınıñ negizinde qwrılğan partiya özin halıqtıq, demokratiyalıq partiya retinde däripteydi. Äu basta «Otan» partiyası dep atalğan ol memlekettik änwran auısqan 2006 jılı Nazarbaev esiminiñ alğaşqı buını qosılıp, atauı «Nwr Otan» dep özgerdi.

"The Qazaq Times"