Qırğızstandağı halıq köterilisi. Foto: azattyq.org

Bügin Qırğızstandağı säuir revolyuciyasına 7 jıl. Osıdan 7 jıl bwrın 7 säuirde bwrınğı qırğız prezidenti Qwrmanbek Bäkievke qarsı halıq jappay ereuilge şığıp, Bişkektiñ Ala-Too alañı qanğa boyalğan bolatın.

Osığan oray bügin Qırğızstan prezidentiniñ saytı Almazbek Atambaevtıñ qırğız halqına ündeuin jariyaladı. Ündeude: «2010 jıldıñ 7 säuiri qırğız halqı üşin öte mañızdı künderdiñ biri. Öytkeni däl osı küni biz elimizdi ekonomikalıq jäne ruhani qwldıraudan aman alıp qaldıq» delingen.

Esteriñizde bolsa,  osıdan biraz uaqıt bwrın Qırğızstan prezidenti Almazbek Atambaev  "Euronews"  arnasına bergen swhbatında resmi Aqordanı bılay dep ayıptağan bolatın.  «2010 jılığı revolyuciya kezinde Qazaqstanıñ şekarasın jauıp tastauı saldarınan bizdiñ elde adam  şığınına deyin boldı. Eger biz Euraziyalıq ekonomikalıq odaqqa kirmesek, bizge tağı osığan wqsas qısım jasaluı mümkin». Atambaevtıñ bwl sözi, eki el arasındağı älde bir sırt közden tasa qarama-qayşılıqtıñ bar ekendigin bayqatqanday boldı. Olay oylaudıñ sebebi de joq emes, öytkeni  säuir revolyuciyası kezinde Qırğızstanda ereuilşilerdi küşpen taratpaqşı bolğan sol kezdegi qırğız prezidenti Qwrmanbek Bakievti , Qazaqstannıñ arnayı jasağı tikeley elbası Nwrswltan Nazarbaevtıñ tapsırmasımen Taraz qalasına jetkizip, aman alıp qalğan bolatın. Al ol kezde Almazbek Atambaev barikadanıñ ar jağında, yağni Roza Otınbaeva bastağan qırğız oppoziciyasınıñ jağında bolatın. Ne de bolsa, 2010 jılı Bişkektegi säuir revolyuciyası Qırğızstan halqınıñ ğana emes qazaq eliniñ tarihına da enetin boldı. Öytkeni, bwğan deyin eş bir el Qazaqstandı adam ölimine sebepşi boldı dep ayıptamağan.

“The Qazaq Times”