Toqaev Qorday düngenderine: Sizderdiñ balalarıñız qazaq tilin üyrenui kerek

Prezident Toqaev Sortöbe auılındağı mädeniet üyinde düngen diasporasımen kezdesuinde memlekettik til talabına qwlaq asu qajettigin ayttı.

Ol elimiz türli tarihi jağdaylarğa baylanıstı, qiın-qıstau zamanda mäjbürli türde qazaq jerin panalap kelgen halıqtıñ bärin qwşaq jaya qarsı alğanın ayttı. Memleket basşısı Qorday audanında bolğan oqiğadan dwrıs qorıtındı şığaru kerek ekenin mälimdedi.

– Bolğan qayğılı oqiğa artta qaluı tiis. Aldağı uaqıtta tatu-tätti, tüsinistikte birge ömir süremiz. Biz bwdan sabaq aluımız kerek. Bwrın-soñdı mwnday jağday bolğan emes. Bwl biliktiñ de jibergen kemşiligi. Sondıqtan men birden oblıs basşılığın, sonıñ işinde qwqıq qorğau organdarınıñ jetekşilerin de auıstırdım, – dedi Toqaev.

Memleket basşısı  düngen diasporasınıñ ökilderin jastardıñ tärbiesine basa män berip, olardı ärbir halıqtıñ mädenietine, qazaq tili men Qazaqstannıñ memlekettik rämizderine qwrmetpen qarauğa şaqırdı.

– Sizderdiñ balalarıñız qazaq tilin üyrenui kerek. Sonday-aq orıs tili men öziniñ ana tilin de bilui qajet. Memleket sizderdiñ mädenietteriñiz ben dästürleriñizdi saqtap, damıtuğa jan-jaqtı qoldau körsetedi. Degenmen sizder, äsirese, auılda twratın azamattar memlekettik tildi bilgenderiñiz asa mañızdı, – dedi.

Sonımen qatar Prezident jastardıñ Qorday audanındağı birneşe auılda ğana emes, Qazaqstannıñ barlıq öñirinde jwmıs isteuine mol mümkindik bar ekenin jetkizdi.

– Qazaqstan – baytaq äri bay memleket. Elimizdiñ soltüstiginde qwnarlı jerler bar. Biz nege bir jerde ğana twraqtauımız kerek? Balalarıñızdı soltüstikke, şığısqa qaray jiberiñizder. Soltüstik, batıs, oñtüstik, şığısta sizderdiñ balalarıñızğa jwmıs istep, aqşa tabuğa mümkindik mol, – dedi Toqaev.

Ol jwrtşılıqtı qayğılı oqiğanıñ qaytalanuına jol bermeuge şaqırdı. Öñirdegi qwqıq qorğau organdarınıñ jaña basşılığına qoğamdıq tärtip pen twrğındardıñ qauipsizdigin qamtamasız etu, sonday-aq, qılmıstıñ aldın alu jöninde mindet jüktedi.

"The Qazaq Times"