توقاەۆ قورداي دۇنگەندەرىنە: سىزدەردىڭ بالالارىڭىز قازاق ءتىلىن ۇيرەنۋى كەرەك

پرەزيدەنت توقاەۆ سورتوبە اۋىلىنداعى مادەنيەت ۇيىندە دۇنگەن دياسپوراسىمەن كەزدەسۋىندە مەملەكەتتىك ءتىل تالابىنا قۇلاق اسۋ قاجەتتىگىن ايتتى.

ول ەلىمىز ءتۇرلى تاريحي جاعدايلارعا بايلانىستى، قيىن-قىستاۋ زاماندا ءماجبۇرلى تۇردە قازاق جەرىن پانالاپ كەلگەن حالىقتىڭ ءبارىن قۇشاق جايا قارسى العانىن ايتتى. مەملەكەت باسشىسى قورداي اۋدانىندا بولعان وقيعادان دۇرىس قورىتىندى شىعارۋ كەرەك ەكەنىن مالىمدەدى.

– بولعان قايعىلى وقيعا ارتتا قالۋى ءتيىس. الداعى ۋاقىتتا تاتۋ-ءتاتتى، تۇسىنىستىكتە بىرگە ءومىر سۇرەمىز. ءبىز بۇدان ساباق الۋىمىز كەرەك. بۇرىن-سوڭدى مۇنداي جاعداي بولعان ەمەس. بۇل بيلىكتىڭ دە جىبەرگەن كەمشىلىگى. سوندىقتان مەن بىردەن وبلىس باسشىلىعىن، سونىڭ ىشىندە قۇقىق قورعاۋ ورگاندارىنىڭ جەتەكشىلەرىن دە اۋىستىردىم، – دەدى توقاەۆ.

مەملەكەت باسشىسى  دۇنگەن دياسپوراسىنىڭ وكىلدەرىن جاستاردىڭ تاربيەسىنە باسا ءمان بەرىپ، ولاردى ءاربىر حالىقتىڭ مادەنيەتىنە، قازاق ءتىلى مەن قازاقستاننىڭ مەملەكەتتىك رامىزدەرىنە قۇرمەتپەن قاراۋعا شاقىردى.

– سىزدەردىڭ بالالارىڭىز قازاق ءتىلىن ۇيرەنۋى كەرەك. سونداي-اق ورىس ءتىلى مەن ءوزىنىڭ انا ءتىلىن دە ءبىلۋى قاجەت. مەملەكەت سىزدەردىڭ مادەنيەتتەرىڭىز بەن داستۇرلەرىڭىزدى ساقتاپ، دامىتۋعا جان-جاقتى قولداۋ كورسەتەدى. دەگەنمەن سىزدەر، اسىرەسە، اۋىلدا تۇراتىن ازاماتتار مەملەكەتتىك ءتىلدى بىلگەندەرىڭىز اسا ماڭىزدى، – دەدى.

سونىمەن قاتار پرەزيدەنت جاستاردىڭ قورداي اۋدانىنداعى بىرنەشە اۋىلدا عانا ەمەس، قازاقستاننىڭ بارلىق وڭىرىندە جۇمىس ىستەۋىنە مول مۇمكىندىك بار ەكەنىن جەتكىزدى.

– قازاقستان – بايتاق ءارى باي مەملەكەت. ەلىمىزدىڭ سولتۇستىگىندە قۇنارلى جەرلەر بار. ءبىز نەگە ءبىر جەردە عانا تۇراقتاۋىمىز كەرەك؟ بالالارىڭىزدى سولتۇستىككە، شىعىسقا قاراي جىبەرىڭىزدەر. سولتۇستىك، باتىس، وڭتۇستىك، شىعىستا سىزدەردىڭ بالالارىڭىزعا جۇمىس ىستەپ، اقشا تابۋعا مۇمكىندىك مول، – دەدى توقاەۆ.

ول جۇرتشىلىقتى قايعىلى وقيعانىڭ قايتالانۋىنا جول بەرمەۋگە شاقىردى. وڭىردەگى قۇقىق قورعاۋ ورگاندارىنىڭ جاڭا باسشىلىعىنا قوعامدىق ءتارتىپ پەن تۇرعىنداردىڭ قاۋىپسىزدىگىن قامتاماسىز ەتۋ، سونداي-اق، قىلمىستىڭ الدىن الۋ جونىندە مىندەت جۇكتەدى.

"The Qazaq Times"