QR Ükimetiniñ prem'er-ministri Asqar Mamin. Foto: aşıq derekközden

Keşe el astanasında eks-prezident N.Ä.Nazarbaev QR Ükimet basşısı Asqar Mamindi qabıldadı. 19 tamız küngi qabıldau turalı Täuelsiz Qazaqstannıñ birinşi prezidentiniñ keñse saytı habarladı. Kezdesu barısında biılğı 7 aydıñ qorıtındısı boyınşa Qazaqstannıñ äleumettik-ekonomikalıq damu nätijeleri talqılanğan. Nazarbaev Arıs qalasınıñ äleumettik mañızdı nısandarı men twrğın üylerin qalpına keltiru procesine, sonday-aq Türkistandı damıtu şaraları, Ükimet pen Nur Otan partiyasınıñ birlese jwmıs isteuiniñ mañızdılığın söz etken. Sonday-aq, resmi habarlamalarğa qarağanda, kezdesude wlttıq ekonomikağa şetel kapitalın tartu jäne öñirlerdegi investiciyalıq ahualdı jaqsartu mäseleleri qaralğan.

19 tamız küngi bwrınğı prezident N.Nazarbaevtıñ qabıldauında otırğan Ükimet basşısı A.Mamin. 19 tamız 2019 jıl. El astanası. Foto: elbasy.kz

Bir qızığı, osıdan eki jwma bwrın Qazaqstannıñ qazirgi prezidenti Qasım-Jomart Toqaev ta prem'er-ministr Asqar Mamindi qabıldap, atalmış jayttarmen mändes birqatar mäseleler turalı tapsırmalar jüktegen bolatın. Atap aytqanda, Ükimet prem'eri  Arıstı qayta qalpına keltiru jäne Türkistandağı infraqwrılım jöninde bayandap, elimizge tartılğan investiciyalar körsetkişi, Euraziyalıq ekonomikalıq odaq ayasında ıqpaldastıqtı damıtu, 2020 jılı Kökşetau qalasında ötetin Qazaqstan men Resey öñiraralıq ıntımaqtastığı forumına dayındıq turalı aytılğan edi.  6 tamız ben 19 tamız Ükimet basşısı eks-prezident pen prezident arasında qayta-qayta bayandama jasap jürgen A.Maminniñ kezdesuleri taqırıbı  äleumettik jelilerde  birşama «qaynağan şäynekti» eske salatın polemika platformasına  aynalıp ülgerdi.

6 tamız küni el prezidenti Qasım-Jomart Toqaev prem'er-ministr Asqar Mamindi qabıldau säti. 6 tamız 2019 jıl. El astanası. Foto: akorda.kz

Nwrswltan Nazarbaev 19 naurızda Qazaqstan halqına öz ökilettigin toqtatatını turalı mälimdegen edi. «Özderiñiz bilesizder, zañdarımızğa säykes men Twñğış Prezident – Elbası (Wlt köşbasşısı) märtebesine ie boldım. Eleuli ökilettigi bar Qauipsizdik keñesiniñ törağası retinde qızmet ete beremin. «Nwr Otan»  partiyasınıñ törağası, Konstituciyalıq keñestiñ müşesimin. YAğni özderiñizben birge bolamın. Elimizdiñ, halqımızdıñ qamı – meniñ müddem bolıp qala beredi», – degen edi ol öz ündeuinde.

Bwğan deyin qabıldanğan zañdarğa säykes, qauipsizdik keñesin ömir boyı basqaru qwqığına ie Nazarbaev biıl 16 mamırda ötken XII Astanalıq ekonomika forumında:

– Men Qazaqstanda ekiwdayılıq bolmaydı dep oylaymın. Bir ğana prezident bar, Bir ğana prezident bar jäne ol – eñ bastısı. Onı saylağannan keyin bärimiz soğan jwmıs isteytin bolamız, – degen edi moderator, Euronews jurnalisi Ştefan Grobeniñ swrağına jauap bere otırıp. Köp ötpey belgilengen küni 9 mausım jalpıhalıqtıq Saylau arqılı Qasım-Jomart Toqaev el prezidenttigine saylanğan edi. Biraq...

Eki apta işinde eks-prezident pen qazirgi prezident qabıldaularında bolıp şıqqan Ükimet basşısı Asqar Mamin. Kollaj. Foto: elbasy.kz jäne akorda.kz

"The Qazaq Times"