Qıtay men Britaniya arasında diplomatiyalıq qayşılıq ornadı. Ötken aptanıñ soñında, Britaniyanıñ Qıtaydağı elşiligi Jyansu provinciyasında britaniyalıq 4 azamattıq twtqındalğanın jäne osı mäselege baylanıstı eki el arasındağı diplomatiyalıq qayşılıqtardıñ küşeygenin rastadı.

Britaniyanıñ Qıtaydağı elşiligi 4 azamatınıñ ne üşin twtqındalğanın aşıp aytpağan. Alayda, Jyansu provinciyasınıñ policiyası ötken aptada esirtki satu qılmısımen 19 adamnıñ twtqındalğanın, olardıñ 16-sı şetel azamatı ekenin mälimdegen.

Qıtaylıq resmi aqparat qwraldarınıñ mälimdeuinşe, şeteldik 16 azamattıñ arasında Şüyjou (Xuzhou) qalasındağı EF Education ortalığınıñ şeteldik oqıtuşılar men Qıtayda oqıp jatqan studentter de bar.

Şet tilderi men mädeniet almastıru maqsatındağı EF Education ortalığı 1965 jılı qwrılğan. Qazir älemniñ köptegen elderinde bilim beru ortalıqtarı bar. Şüyjou qalasındağı atalğan ortalıq ötken aptada mälimdeme jasap, bwl oqiğa üşin Qıtay tarabınan keşirim swrağan jäne mäseleni şeşu üşin bilik tarabımen tığız baylanısta bolatının aytqan.

Soñğı birneşe ayda London men Beyjiñniñ qarım-qatınası naşarlay tüsti. Britandıq ağa lauazımdılar qayşılıqtıñ tüpkilikti sebebi eki el arasında ötken ğasırdıñ 80-şi jıldarı qol qoyılğan Gonkong taqırıbındağı ekijaqtı kelisimderge baylanıstı boluı mümkin dep qaraydı. Soñğı kezderi Gonkongte Beyjiñniñ sayasi şeşimderine qarsılıq küşeyip, massalıq ereuilder jalğasıp jatqanı belgili. Beyjiñ biligi bwnı sırtqı küşterdiñ äseri dep qaraydı.

“The Qazaq Times”