Tayuan Ğılım Akademiyası öndiretin Xiongfeng-3 zımırandarı. Foto: VOA.

Qıtaydıñ Tayuanğa (Tayvan') qaratqan äskeri qısımı küşeygen sayın, Tayuan tarabı da qorğanıs quatın jedel arttırıp, tuıluı mümkin soğıs qaterine dayındaluda.

Tayuan prezidenti Cay Iıñvın (Cai Yingwen) hanım Tayuandağı Ğılım Akademiyasın aralağan kezde zımıran öndirisin tezdetudi tapsırdı. Ol sözinde: "Tayuan qauipsizdigi qaterge wşırağanda nemese kürdeli wlttıq qauipsizdik jağdayında wlttıq qauipsizdiktiñ şwğıl qajettigine oray Tayuan Ğılım Akademiyası Tiangong-3 jäne Xiongfeng-3  zımırandarğa bolğan qajettilikti tolıq öteui tiis", – dedi.

Britaniyanıñ «Economist» jurnalınıñ 25 qañtardağı habarında, Qıtaydıñ arta tüsken äskeri qısımına baylanıstı, Tayuannıñ qorğanıs quatın jedel damıtıp, «jwtılıp» ketpeuge dayındalıp otırğanın jazğan. Degenmen, Beyjiñ üşin Tayuanğa qarulı küş jwmsaudıñ oñay bolmaytının, äri bwl bir ğana Tayuan men Qıtay arasındağı qayşılıq emes ekenin osıdan bwrın da aytqan edik.

Demokratiyalıq partiyanıñ ökili bolğan Say Iıñvın hanım 2015 jılı 20 mamırda bilikke kelgen. Beyjiñ biligi Say Iıñvın ükimetinen sayasi baylanıstar men konsul'taciyalardıñ alğı şartı retinde «92 konsensustı» qabıldaudı talap etedi. Alayda, Tayuan ükimeti 1992 jılğı tarihi kelisimdi negiz ete otırıp, Beyjiñ tarabı wsınğan «92 konsensustı» qabıldaudan bas tartıp keledi. Bwl Beyjiñ men Taybey arasındağı sayasi alauızdıqtı örşitip, Tayuannıñ halıqaralıq wyımdarğa qatısuına, özge eldermen diplomatiyalıq baylanıs ornatuına Beyjiñ tarabınan kedergiler jasaluda.

“The Qazaq Times”