Foto: "Astana" prezidenttik klubınıñ baspasöz qızmeti

Qazaqstan sportı tarihında ülken jañalıqqa balanıp, özine artılğan senimdi tolığımen aqtap, el sportına kürzi jwdırıqtı talay boksşını sıylay alğan, älemdik boksta özin moyındatqan «Astana Arlandarı» jartılay käsipqoy klubı taratıldı.

Bwl turalı bügin ötken baspasöz mäslihatında Qazaqstan boks federaciyasınıñ vice-prezidenti Daniyar Abulğazin aytıptı. Klub özi qwrılğan uaqıttan beri segiz jıl uaqıt işinde bes märte bükil älemdik boks seriyasınıñ (WSB) finalına şıqtı. Sonıñ üşeuinde qarsılas komandadan basım tüsip, altın jülde enşiledi. Sonımen qatar klubtıñ qorjınında eki qola medal' bar.

«Astana Arlandarı» kubalıq «Kuba Domadores» klubımen birge turnirdiñ eñ tituldı wjımdarı sanaladı. «Astana Arlandarınıñ» atağı şığa bastağan alğaşqı jıldarı klubtı belgili boks menedjeri Bolat Mankenov basqarıp twrğan. Sol twsta komanda sapında Qanat Islam, Sergey Derevyançenko sekildi azulı boksşılar öner körsetip, qazaq komandasınıñ namısın abıroymen qorğadı. Keyin ekeui de käsipqoy boksqa birjola auısıp, öz kar'eraların sätti jalğastıra aldı.

Qazaqstan käsipqoy boks federaciyasınıñ vice-prezidenti Viktor Dem'yanenkonıñ aytuınşa, belgili klubtıñ tarap ketui – otandıq boksqa tek teris äserin ğana tigizedi.

«Astana Arlandarınıñ» WSB jobasınan bas tartuı – otandıq boks üşin ülken minus. Komanda öz janküyerlerin quanttı. Nağız boks sıyladı. Endi äri qarayğı tağdırınıñ qalay örbitinin ayta almaymın» deydi ol.

Jağdayğa baylanıstı «Astana Arlandarınıñ» bas bapkeri Nwrlan Aqürpekov ta pikir bildirdi.

Nwrlan Aqürpekovtıñ fotosı: Qazaqstan boks federaciyası

«Jalpı, «Astana Arlandarı» ğana emes, WSB jobasındağı barlıq komandanıñ da jolı jabılıp twr dep aytuğa boladı. Jaqında ğana Ğafur Rahimov AIBA prezidenti bolıp saylandı ğoy. Meniñşe, sol kisiniñ jasap jatqan özgeristeri siyaqtı. Ol kisiniñ «Boks men üşin zardap şegetin bolsa, otstavkağa ketuge dayınmın» dep bergen swhbatı bar eken. Endi, bayqap köreyik. Otstavkağa ketken jağdayda, basqa prezident kelui mümkin. Ol qanday jañalıq aşadı nemese ötken qatelikti tüzeydi degendey. Sol kezde barıp WSB jobası qayta oraluı mümkin. Jalpı, «Astana Arlandarınıñ» otandıq boksqa bergen paydası öte orasan. Äuesqoy boksta bağı janbay jürgen mıqtı boksşılarımız osı klubqa kelip, öz joldarın taptı. Jarqın jeñisterge jetti. AQŞ-tı şulatıp jürgen Madiyar Äşkeev, Meyirim Nwrswltanov, Batır Jükembaev, Ashat Uälihanov, Aydos Erbosınwlı, Arman Rısbek, jalpı qay-qaysın alsaq ta bäri bizdiñ mektepten ötken, ısılıp, şıñdalıp, «arlanğa» aynalğan potencialı joğarı jigitter. Qazirgi kezde de «Astana Arlandarı» qatarında jwdırıqtasuğa layıqtı boksşılarımız öte köp edi. Olardıñ bäri birdey wlttıq qwramağa ilinbeydi. İlinse de birinşi nömir bola almauı mümkin. Sondıqtan olar özderiniñ täjiribesin jetildirip, mıqtı bola tüsu üşin osınday reytingi, jağdayı joğarı klub kerek-aq edi» deydi Aqürpekov.

Eske salsaq, Nwrlan Aqürpekov 2013-2018 jıldar aralığında «Astana Arlandarı» klubı sapında bapker retinde qızmet etti. 2008 jılı Beyjiñ olimpiadasınıñ çempionı atanğan Baqtiyar Artaevtıñ wstazı. Qazirgi tañda 75 kelige deyingi salmaqta jwdırıqtasatın, älem çempionatınıñ kümis jüldegeri Äbilhan Amanqwldı jattıqtırıp jür.

“The Qazaq Times”