ايگىلى «استانا ارلاندارى» كلۋبى تاراپ كەتتى

قازاقستان سپورتى تاريحىندا ۇلكەن جاڭالىققا بالانىپ، وزىنە ارتىلعان سەنىمدى تولىعىمەن اقتاپ، ەل سپورتىنا كۇرزى جۇدىرىقتى تالاي بوكسشىنى سىيلاي العان، الەمدىك بوكستا ءوزىن مويىنداتقان «استانا ارلاندارى» جارتىلاي كاسىپقوي كلۋبى تاراتىلدى.

بۇل تۋرالى بۇگىن وتكەن ءباسپاسوز ءماسليحاتىندا قازاقستان بوكس فەدەراتسياسىنىڭ ۆيتسە-پرەزيدەنتى دانيار ابۋلعازين ايتىپتى. كلۋب ءوزى قۇرىلعان ۋاقىتتان بەرى سەگىز جىل ۋاقىت ىشىندە بەس مارتە بۇكىل الەمدىك بوكس سەرياسىنىڭ (WSB) فينالىنا شىقتى. سونىڭ ۇشەۋىندە قارسىلاس كوماندادان باسىم ءتۇسىپ، التىن جۇلدە ەنشىلەدى. سونىمەن قاتار كلۋبتىڭ قورجىنىندا ەكى قولا مەدال بار.

«استانا ارلاندارى» كۋبالىق «كۋبا دومادورەس» كلۋبىمەن بىرگە ءتۋرنيردىڭ ەڭ تيتۋلدى ۇجىمدارى سانالادى. «استانا ارلاندارىنىڭ» اتاعى شىعا باستاعان العاشقى جىلدارى كلۋبتى بەلگىلى بوكس مەنەدجەرى بولات مانكەنوۆ باسقارىپ تۇرعان. سول تۇستا كوماندا ساپىندا قانات يسلام، سەرگەي دەرەۆيانچەنكو سەكىلدى ازۋلى بوكسشىلار ونەر كورسەتىپ، قازاق كومانداسىنىڭ نامىسىن ابىرويمەن قورعادى. كەيىن ەكەۋى دە كاسىپقوي بوكسقا ءبىرجولا اۋىسىپ، ءوز كارەرالارىن ءساتتى جالعاستىرا الدى.

قازاقستان كاسىپقوي بوكس فەدەراتسياسىنىڭ ۆيتسە-پرەزيدەنتى ۆيكتور دەميانەنكونىڭ ايتۋىنشا، بەلگىلى كلۋبتىڭ تاراپ كەتۋى – وتاندىق بوكسقا تەك تەرىس اسەرىن عانا تيگىزەدى.

«استانا ارلاندارىنىڭ» WSB جوباسىنان باس تارتۋى – وتاندىق بوكس ءۇشىن ۇلكەن مينۋس. كوماندا ءوز جانكۇيەرلەرىن قۋانتتى. ناعىز بوكس سىيلادى. ەندى ءارى قارايعى تاعدىرىنىڭ قالاي ءوربيتىنىن ايتا المايمىن» دەيدى ول.

جاعدايعا بايلانىستى «استانا ارلاندارىنىڭ» باس باپكەرى نۇرلان اقۇرپەكوۆ تا پىكىر ءبىلدىردى.

نۇرلان اقۇرپەكوۆتىڭ فوتوسى: قازاقستان بوكس فەدەراتسياسى

«جالپى، «استانا ارلاندارى» عانا ەمەس، WSB جوباسىنداعى بارلىق كوماندانىڭ دا جولى جابىلىپ تۇر دەپ ايتۋعا بولادى. جاقىندا عانا عافۋر راحيموۆ AIBA پرەزيدەنتى بولىپ سايلاندى عوي. مەنىڭشە، سول كىسىنىڭ جاساپ جاتقان وزگەرىستەرى سياقتى. ول كىسىنىڭ «بوكس مەن ءۇشىن زارداپ شەگەتىن بولسا، وتستاۆكاعا كەتۋگە دايىنمىن» دەپ بەرگەن سۇحباتى بار ەكەن. ەندى، بايقاپ كورەيىك. وتستاۆكاعا كەتكەن جاعدايدا، باسقا پرەزيدەنت كەلۋى مۇمكىن. ول قانداي جاڭالىق اشادى نەمەسە وتكەن قاتەلىكتى تۇزەيدى دەگەندەي. سول كەزدە بارىپ WSB جوباسى قايتا ورالۋى مۇمكىن. جالپى، «استانا ارلاندارىنىڭ» وتاندىق بوكسقا بەرگەن پايداسى وتە وراسان. اۋەسقوي بوكستا باعى جانباي جۇرگەن مىقتى بوكسشىلارىمىز وسى كلۋبقا كەلىپ، ءوز جولدارىن تاپتى. جارقىن جەڭىستەرگە جەتتى. اقش-تى شۋلاتىپ جۇرگەن ماديار اشكەەۆ، مەيىرىم نۇرسۇلتانوۆ، باتىر جۇكەمباەۆ، اسحات ءۋاليحانوۆ، ايدوس ەربوسىنۇلى، ارمان رىسبەك، جالپى قاي-قايسىن الساق تا ءبارى ءبىزدىڭ مەكتەپتەن وتكەن، ىسىلىپ، شىڭدالىپ، «ارلانعا» اينالعان پوتەنتسيالى جوعارى جىگىتتەر. قازىرگى كەزدە دە «استانا ارلاندارى» قاتارىندا جۇدىرىقتاسۋعا لايىقتى بوكسشىلارىمىز وتە كوپ ەدى. ولاردىڭ ءبارى بىردەي ۇلتتىق قۇراماعا ىلىنبەيدى. ىلىنسە دە ءبىرىنشى ءنومىر بولا الماۋى مۇمكىن. سوندىقتان ولار وزدەرىنىڭ تاجىريبەسىن جەتىلدىرىپ، مىقتى بولا ءتۇسۋ ءۇشىن وسىنداي رەيتينگى، جاعدايى جوعارى كلۋب كەرەك-اق ەدى» دەيدى اقۇرپەكوۆ.

ەسكە سالساق، نۇرلان اقۇرپەكوۆ 2013-2018 جىلدار ارالىعىندا «استانا ارلاندارى» كلۋبى ساپىندا باپكەر رەتىندە قىزمەت ەتتى. 2008 جىلى بەيجىڭ وليمپياداسىنىڭ چەمپيونى اتانعان باقتيار ارتاەۆتىڭ ۇستازى. قازىرگى تاڭدا 75 كەلىگە دەيىنگى سالماقتا جۇدىرىقتاساتىن، الەم چەمپيوناتىنىڭ كۇمىس جۇلدەگەرى ءابىلحان امانقۇلدى جاتتىقتىرىپ ءجۇر.

“The Qazaq Times”