Bişkek qalalıq sotı qazaqstandıq belsendi Mwratbek Twñğışbaevtı qamauğa alu turalı audandıq sottıñ şeşimin özgerissiz qaldırdı. Bwl turalı ayıptaluşınıñ qorğauşısı Nwrbek Toqtaqunov mälimdedi. Advokattıñ aytuınşa, qazaq wltşılı eki ayğa türmege toğıtılğan.

Zañger Bişkek sotı qorğau tarabı keltirgen däyekterdiñ eşbirin eskermey, birjaqtı şeşim şığara saldı dep qınjıladı.

 - Sot keltirgen däyekterimizdiñ eşqaysısın eskergen joq. Qazaqstan Respublikasınıñ Qılmıstıq kodeksindegi 266-baptıñ Qırğızstan zañında balaması joq. Kişinev konvenciyası, özge de halıqaralıq kelisimderge säykes, mwnday kezde azamattardı özge elge bermeydi. Al eger berilmese, onda qamauğa da aluğa bolmaydı. Osı siyaqtı dälelderdiñ eşqaysısı sotta eskerilmedi. Sot tek bwlardı aynalıp ötti, - deydi Nwrbek Toqtaqunov.

24 mamırda Qırğızstan bas prokuraturası qazaqstandıq belsendi Mwratbek Twñğışbaevtı Qazaqstan biligine tapsıru turalı şeşim şığarğan.

Bas prokuratura qaulısında Qazaqstanda belsendiniñ üstinen "qılmıstıq toptıñ qızmetin qarjılandıru" jäne "ekstremistik wyım qwru jäne onıñ qızmetine qatısu" boyınşa ayıptar tağılıp otırğanı jazılğan. Qaulıda sonımen birge, onıñ wstaluında "sayasi astarı joq" ekeni jäne onıñ azaptauğa wşıramaytını turalı da aytılğan.

Advokat Nwrbek Toqtaqunov Qırğızstan bas prokuraturasınıñ bwl şeşimine baylanıstı appelyaciyalıq şağımdı osı aptada sotqa tüsiretinin ayttı.

Qazaqstandıq belsendi Mwratbek Twñğışbaevtı Qırğızstannıñ arnayı qızmet ökilderi mamırdıñ 10-ı küni Bişkekte twrıp jatqan jerinde wstağan. Kelesi küni Bişkektiñ Pervomay audandıq sotı onı eki ayğa qamau turalı şeşim şığarğan.

“The Qazaq Times”