Foto: sputniknews.com

Liviyanıñ bwrınğı basşısı Muammar Qaddafidiñ resmi audarmaşısı Meftah Äbdallah Missuri Qaddafidiñ jomarttığın tek Franciyanıñ bwrınğı prezidenti Sarkozidiñ ğana paydalanbağanı, Mısır men Tunistiñ bwrınğı basşılarınıñ da odan kömek swrağanı jayında mälimetterdi taratqan. Bwl  "Sputnik News aqparat agenttigi habarladı.

Atalğan aqparat agenttigine swhbat bergen Missuri: "Kezinde Qaddafiden Mübarak (Mısırdıñ bwrınğı basşısı Husni) pen Bin Äli (Tunistiñ bwrınğı prezidenti Zeynel Abidin) de kömek swrağan edi. Ol Aziyadan bastap Latın Amerikasına deyin, barlıq "üşinşi älem" elderine kömek körsetetin. Mısalı, Franciyanıñ Sırtqı ister ministrliginiñ byudjeti 1 mlrd. 700 mln. edi. Bwl qarjınıñ 780 mln.-ı onıñ özge eldermen qarım-qatınasın damıtu üşin jäne olarğa kömek körsetu üşin bölindi. Al Liviyada mwnday maqsattar üşin eşqaşan aldın ala qarjı bekitilmedi. Biz tabiğat apattarınan, aşarşılıqtan zardap şeguşilerdiñ bärine kömek körsettik. Olarğa däri-därmek, wşaq jiberetinbiz. Bizden kömek swrağan qanday da bir el basşısına jartı million men 5 million dinar aralığında kömek beriletin" , - dedi. Sonday-aq, Qaddafidiñ Sarkozidiñ saylau nauqanın jeke özi qarjılandırğanınıñ ras ekenin aytqan Missuri, tömendegi sındı birqatar saualdarğa jauap berdi:

"20 mln euro berdi"

Sarkozidiñ saylau nauqanına qatıstı kezdesulerden bölek, Qaddafidiñ barlıq mañızdı kezdesulerine audarmaşı retinde qatısqanın aytqan Missuri, "Liviya biligi Franciyağa 50 mln. euro wsındı, alayda 20 mln. euro jetkilikti boldı" , - dedi.

"Mısır men Tunis prezidentteri kömek swradı"

"Muammar Qaddafiden tağı kimder kömek swrağan?" , - degen saualğa Missuri: "Mısır men Tunis prezidentteri. Olar bilik basınan Qaddafiden bwrın ketti. Sondıqtan, ol qinalğan kezde eşqanday kömek körsete almadı. Afrika elderi Liviyada 2011 jıldıñ 11 aqpan ayında bastalğan ereuilderdi auızdıqtauğa tırıstı, alayda sätsiz boldı. Qaddafige Oñtüstik Afrika Respublikası, Venesuela jäne Belarus' kömek qolın sozdı, alayda ol otanın tastap ketkisi kelmedi" , - dedi.

"Qaddafidiñ aqşaları qayda?"

Missuri bwl saualğa: "Muammar Qaddafi qaza tapqannan keyin oğan tiesili eşqanday dünie tabılmadı. Onıñ atındağı üylerdiñ barlığı resmi türde Liviya Jinaq Qorlar ministrligine jäne balalarğa audarıldı. Al qolma-qol aqşa onsız da joq edi. Qatelespesem, şetel bakterinde Qaddafidiñ atına aşılğan esepşot joq. Mümkin, balalarınıñ atına aşılğan esepşottar bar bolar, alayda men ol jağın bilmeymin. Men Muammar Qaddafi otbasınıñ emes, onıñ öziniñ audarmaşısı boldım , - dep jauap berdi."

“The Qazaq Times”