Foto: Anna News

Palestinanıñ Prezidenti Mahmwd Abbas düysenbi küni Europa Odağına müşe elderdiñ Sırtqı İster ministrlerimen kezdesu barısında olardıñ Palestina memleketin resmi türde moyındauın swraydı. Mwnday aqparattı AFP aqparattıq agenttigine Palestinanıñ Sırtqı İster ministri Riyad-äl-Mäliki bergen. Ol Palestina basşısınıñ Euroodaq elderinen  AQŞ-tıñ Ierusalimdi Izrail'diñ astanası dep jariyalauına jauabın kütetinin bildirdi. 

Mahmwd Abbas Euroodaqtıñ diplomatiyalıq basşısı Federika Mogerini jäne odaqqa müşe  28 memlekettiñ Sırtqı İster ministrlerimen kezdesedi. Bir ay bwrın däl osınday saparmen Bryussel'ge Izrail'diñ Prem'er-ministri Ben'yamin Netan'yahu kelgen bolatın. Palestina basşısı Europa memleketteriniñ öziniñ älemdik sayasi ıqpalın körsetip, eki tarap üşin de ädil şeşim qabıldağandarın qalaydı. Atap ötu kerek, osıdan bwrın Europa memleketteri AQŞ-tıñ Ierusalimdi Izrail'diñ astanası dep moyındauın qatañ sınağan edi.

Mahmwd Abbas "Ierusalim dauı" bastalğan kezde, Osloda qabıldanğan kelisimderdiñ bwzıluına narazılıq tanıtıp, Izrail' men Palestina arasındağı soñğı nüktesi qoyılmağan talastı AQŞ-tıñ özinşe şeşkenin "ğasır soqqısı" dep bağalağan edi. Degenmen AQŞ-tıñ Vice-Prezidenti Mayk Penspen kezdesuden bas tartqanına jäne Amerika Tayau Şığıstağı beybit kelissözderge bastamaşı bolu qwqığınan ayırılğanı jönindegi batıl mälimdemelerine qaramastan, Palestina basşısı mäseleni talqılauğa "aşıq" ekenin bildirip otır.

“The Qazaq Times”