پالەستينا ەۋرووداقتان ءوزىن مەملەكەت رەتىندە مويىنداۋدى سۇرادى

پالەستينانىڭ پرەزيدەنتى ماحمۇد ابباس دۇيسەنبى كۇنى ەۋروپا وداعىنا مۇشە ەلدەردىڭ سىرتقى ىستەر مينيسترلەرىمەن كەزدەسۋ بارىسىندا ولاردىڭ پالەستينا مەملەكەتىن رەسمي تۇردە مويىنداۋىن سۇرايدى. مۇنداي اقپاراتتى AFP اقپاراتتىق اگەنتتىگىنە پالەستينانىڭ سىرتقى ىستەر ءمينيسترى رياد-ءال-ماليكي بەرگەن. ول پالەستينا باسشىسىنىڭ ەۋرووداق ەلدەرىنەن  اقش-تىڭ يەرۋساليمدى ءيزرايلدىڭ استاناسى دەپ جاريالاۋىنا جاۋابىن كۇتەتىنىن ءبىلدىردى. 

ماحمۇد ابباس ەۋرووداقتىڭ ديپلوماتيالىق باسشىسى فەدەريكا موگەريني جانە وداققا مۇشە  28 مەملەكەتتىڭ سىرتقى ىستەر مينيسترلەرىمەن كەزدەسەدى. ءبىر اي بۇرىن ءدال وسىنداي ساپارمەن بريۋسسەلگە ءيزرايلدىڭ پرەمەر-ءمينيسترى بەنيامين نەتانياحۋ كەلگەن بولاتىن. پالەستينا باسشىسى ەۋروپا مەملەكەتتەرىنىڭ ءوزىنىڭ الەمدىك ساياسي ىقپالىن كورسەتىپ، ەكى تاراپ ءۇشىن دە ءادىل شەشىم قابىلداعاندارىن قالايدى. اتاپ ءوتۋ كەرەك، وسىدان بۇرىن ەۋروپا مەملەكەتتەرى اقش-تىڭ يەرۋساليمدى ءيزرايلدىڭ استاناسى دەپ مويىنداۋىن قاتاڭ سىناعان ەدى.

ماحمۇد ابباس "يەرۋساليم داۋى" باستالعان كەزدە، وسلودا قابىلدانعان كەلىسىمدەردىڭ بۇزىلۋىنا نارازىلىق تانىتىپ، يزرايل مەن پالەستينا اراسىنداعى سوڭعى نۇكتەسى قويىلماعان تالاستى اقش-تىڭ وزىنشە شەشكەنىن "عاسىر سوققىسى" دەپ باعالاعان ەدى. دەگەنمەن اقش-تىڭ ۆيتسە-پرەزيدەنتى مايك پەنسپەن كەزدەسۋدەن باس تارتقانىنا جانە امەريكا تاياۋ شىعىستاعى بەيبىت كەلىسسوزدەرگە باستاماشى بولۋ قۇقىعىنان ايىرىلعانى جونىندەگى باتىل مالىمدەمەلەرىنە قاراماستان، پالەستينا باسشىسى ماسەلەنى تالقىلاۋعا "اشىق" ەكەنىن ءبىلدىرىپ وتىر.

“The Qazaq Times”