Älemdegi eñ ülken talastağı öñir – Kaşmir. Foto: commons.wikimedia.org.

Päkistan ükimeti Ündistan ükimetin Kaşmir öñirinde, biıl bir jıldıñ işinde, 600 retten astam arandatuşılıq äreketke bardı dep ayıptadı. Sonıñ saldarınan päkistandıq 34 beybit twrğınnıñ qaza tapqanın alğa tarttı. Bwl turalı «Hindustan Times» (Ündistan tayms) basılımına silteme jasay otırıp, «Şinlañ» aqparattıq saytı jazdı.

Päkistannıñ SİM mälimdemeşisi Nafis Zakariya Ündistan ükimetiniñ köşi-qon arqılı Kaşmir jergilikti halqınıñ demografiyalıq qwramın özgertuge wmtılıp otırğanın ayıptadı.  Bwl turalı Päkistan Sırtqı ister ministrliginiñ ökili twraqtı ötkiziletin aptalıq baspasöz konferenciyasında ayttı. Sonımen birge ol, bwrınğı Pakistan prem'er-ministri atınan BWW-ğa joldanğan hatta da, Ündistannıñ Kaşmir halqınıñ demografiyalıq qwramın özgertuge tırısqan äreketi üstinen şağımdanğandarın aytıp ötti.

Päkistan jaq bwğan qosa, BWW äskeri baqılauşılar tobınıñ Ündistan ükimeti jağınan şekteuge wşırap otırğanın da atap ötti. 1947 jılı Ündistan men Päkistan bölingennen keyin, eki el arasında Kaşmir öñiri üşin talas soğıs jürgizildi. 2003 jılı qos tarap Kaşmir mäselesinde kelissöz jürgizip, qaqtığıstı toqtatıp, ortaq baqılau aymağı retinde kelisimge qol qoydı. Alayda, eki el arasında qaqtığıstar tolastap qalğan joq. Soñğı kezderi, Ündistan-Qıtay, Ündistan-Päkistan arasındağı şekaralıq daular örşip, Päkistan men Qıtaydıñ strategiyalıq odaqtastığın arttıra tüsti.

“The Qazaq Times”