Foto: alarabiya.net

Al Arabiya telearnası "Islam memleketi" lañkestik wyımınıñ jaña basşısı qızmetine tağayındaluı mümkin twlğanıñ fotosuretin jariyaladı. Tayau şığıstıñ baq ökilderiniñ boljaldı aqparatına säykes, Abu Bakr al'-Bağdadidiñ öliminen keyin wyımdı onıñ jaqın kömekşisi Djalaludin al'-Tunisi basqaruı mümkin. 

1982 jılı Tuniste düniege kelgen  Djalaludin al'-Tunisidiñ şın atı - Muhammed Ben Salem al'-Auni. Franciyada wzaq jıldar boyı twrıp, osı eldiñ azamattığın alğan ol, Tuniste revolyuciya örti twtanğannan keyin, otanına oralğan. Odan äri Siriya asıp, terroristerdiñ qatarına qosılğan.

Mausım ayınıñ ortasında Resey Federaciyasınıñ Qorğanıs ministrligi  28 mausım küni Resey wşaqtarınıñ Rakki eldimekeninde lañkestik topqa qarsı jasağan şabuılı nätijesinde, "Islam memleketi" wyımınıñ basşısı  - Abu Bakr al'-Bağdadi ölui mümkin dep mälimdegen edi. Keyinnen, Al Sumaria telearnası lañkestik top müşeleri basşısınıñ ölimin rastadı dep habarladı. Reuters agenttigi terroristik wyım basşısınıñ öliminiñ anıq-qanığın tekseru mümkin bolmay otırğanın jetkizdi. Al küni keşe Iraktıñ barlau qızmeti Abu Bakr al'-Bağdadidiñ ölimine kümän keltirip, ol tiri jäne Süriyanıñ Rakka aymağında jasırınıp jürui mümkin degen boljam wsındı.

“The Qazaq Times”