Ukrainanıñ Wlıbritaniyadağı elşisi Valeriy Zalujnıy. Foto: ZUMA PRESS

Ukrainanıñ Wlıbritaniyadağı elşisi Valeriy Zalujnıy AQŞ-tıñ qazirgi sırtqı sayasat jürgizu täsilin sınap, onıñ halıqaralıq tärtipti «bwzıp jatqanın» mälimdedi. Onıñ aytuınşa, Aq üydiñ äreketteri «bükil Batıs äleminiñ birligin» kümänğa aynaldırıp otır, dep jazdı BBC aqparatı.

Bwl mälimdeme Ukraina prezidenti Vladimir Zelenskiy men AQŞ prezidenti Donal'd Tramp arasındağı qarım-qatınastıñ şielenisui ayasında jasaldı. Ötken jwmada Aq üyde ötken kezdesude eki el basşıları arasında kelispeuşilikter bolğanı belgili. Osıdan keyin Kiev Vaşingtonmen baylanısın jaqsartu äreketterin jasay bastadı. Alayda, AQŞ-tıñ Ukrainağa äskeri kömekti toqtatuı jäne barlau mälimetterimen almasudı uaqıtşa doğara twruı Zelenskiyge qısım körsetu qwralı retinde bağalandı.

Zalujnıydıñ Londonda ötken Chatham House konferenciyasında aytqan sözderi bwl jağdayğa degen Ukraina tarapınan ülken alañdauşılıq barın körsetti.

"AQŞ älemdik tärtipti joyıp jatır"

Zalujnıy öz sözinde: «Biz tek Resey men onıñ jaqtastarı älemdik tärtipti qayta qarastırıp jatır dep oylaytın edik. Biraq şın mäninde, AQŞ bwl tärtipti joyıp jatır», – dep mälimdedi.

Sonımen qatar, ol Vaşingtonnıñ Reseymen tikeley kelissözder jürgizuin sınğa aldı. Onıñ aytuınşa, «Kreml'di basqarıp otırğan soğıs qılmıskeri» Vladimir Putinmen dialog jürgizu – Reseyge ımıra berudiñ belgisi bolıp tabıladı.

Zalujnıy AQŞ-tıñ qazirgi bağıtı NATO-nıñ bolaşağına da qauip töndirui mümkin ekenin eskertti. Onıñ oyınşa, eger Vaşington öz sayasatın özgerpese, bwl al'yanstıñ ıdırauına äkelui mümkin. Sonday-aq, ol Reseydiñ kelesi nısanası Europa boluı ıqtimal ekenin ayttı.

AQŞ-tıñ Ukrainağa qısımı jäne Zelenskiydiñ äreketteri

Zelenskiy Ukrainanıñ beybitşilikke wmtılatının birneşe ret mälimdegenimen, onıñ äkimşiligi AQŞ-tıñ kelissözderdi basqaru täsiline kümänmen qaraydı. Kiev Vaşingtonnıñ Mäskeuge jasaluı mümkin ıqtimal jeñildikterin öz qauipsizdigine tönetin qater dep sanaydı.

Tramp saylaualdı nauqanında Ukrainadağı soğıstı tez arada toqtatuğa uäde bergen bolatın. Osığan baylanıstı, ötken ayda AQŞ delegaciyası Resey ökilderimen Saud Arabiyasında aldın ala kelissözder ötkizdi. Bwl kezdesuge Ukraina da, Europa memleketteri de qatısqan joq.

Vaşington tarapı Ukrainağa kömek körsetudi uaqıtşa toqtatu arqılı Kievti AQŞ bastamaşılıq etken beybit kelissözderge keluge itermeleudi közdep otırğanın mälimdedi.

Ukrainadağı sayasi ahual jäne ıqtimal özgerister

AQŞ pen Ukrainanıñ qarım-qatınası şielenisken twsta, Politico basılımı Tramp äkimşiliginiñ Zelenskiydiñ sayasi opponentterimen baylanıs ornatqanı turalı habarladı. Bwl baylanıstar arasında oppoziciya jetekşisi YUliya Timoşenko men eks-prezident Petr Poroşenkonıñ seriktesteri bar.

Ukrainadağı täuelsiz äleumettik saualnamalarğa säykes, Zalujnıy halıq arasındağı qoldauğa ie negizgi twlğa sanaladı. Onıñ reytingtik körsetkişi 70%-dan asadı, al Zelenskiyge degen qoldau 57% şamasında. Poroşenkonı qoldaytındar 20%-ğa jetpeydi.

Timoşenko bwl aqparatqa qatıstı pikir bildirip, öziniñ komandası barlıq halıqaralıq äriptestermen baylanısta ekenin, biraq qazirgi soğıs jağdayında Ukrainada saylau ötkizuge bolmaytının atap ötti. Al Poroşenko öz mälimdemesinde AQŞ-pen baylanıstardıñ aşıq äri zañdı ekenin ayttı.

Keybir sarapşılardıñ pikirinşe, Tramp äkimşiligi Zelenskiydiñ ornına basqa kandidattardı qarastıruı mümkin. Alayda, oppoziciya ökilderimen kezdesuler soğısqa deyin de bolğan jäne AQŞ-pen qarım-qatınastardı nığaytu maqsatında jasalğan boluı mümkin.

AQŞ pen Ukrainanıñ qazirgi qarım-qatınastarınıñ damuı aldağı uaqıttağı geosayasi jağdayğa tikeley äser etetini anıq.

The Qazaq Times