Qazaqstannan bosqın märtebesin ala almağan Şıñjañ qazağı Qayrat Erlibek Türkiya aumağına ötti. Bwl turalı qwqıq qorğauşı, "Halıqaralıq qwqıqtıq bastama" wyımınıñ jetekşisi Ayna Şormanbaeva habarladı. Bwl turalı Ortalıq Aziya jañalıqtar qızmeti jazdı.

Bwğan deyin Qazaqstannan Türkiyağa wşıp barğan Qayrat Erlibek özin äuejaydan äri qaray ötkizbey twrğanın habarlap, kömek swrağan edi.

Ayna Şormanbaevanıñ aytuınşa, Qayrat Twrlıbek BWW-nıñ aralasuımen şekaradan aman-esen ötken.

– Qazir ol qolındağı qwjatına ştamp basqızıp, şekaradan ötti. Endi oğan Türkiyadan bosqın märtebesin alıp beruge kömektesetin advokat izdep jatırmın. Bwl is meniñ tikeley aralasuımmen şeşildi, – dedi 14 mausımda tüste Ayna Şormanbaeva Azattıq tilşisine.

Bir kün bwrın äleumettik jelide jariyalanğan videoda Qayrat Erlibek "Men Qıtaydan kelgen qazaqpın. Wltım da – qazaq. Prezidentim de – qazaq. Biraq Qazaqstannan eşqanday märtebe ala almadım. Pana izdep Türkiyağa kelip edim, arı qaray ketip qaluğa mümkindik bolmadı" dep mälimdegen edi. Ol Qazaqstan biliginen bosqın märtebesin swrağanın qwqıq qorğauşılar da rastağan.

Qayrat Erlibektiñ Almatı oblısında twratın äpkesi Maqpal Twrlıbektiñ aytuınşa, inisi Türkiya arqılı Kanadağa barıp, sol jerden bosqın märtebesin almaq bolğan.

Qayrat Erlibek 1989 jılı Qıtaydıñ Şıñjañ ölkesinde düniege kelgen. 2009 jılı Qazaqstanğa köşip kelgen.

Ol bıltır küzde Azattıqqa habarlasıp, "2009 jılı qwjattarın joğaltıp alğanın, qolında Qıtaydıñ Almatıdağı konsuldığı bergen jol jüru bileti men Almatı oblıstıq jwmıspen qamtu jäne äleumettik bağdarlamalar basqarması bergen "pana izdeuşi twlğa" kuäliginiñ ğana bar ekenin, soñğı qwjattı eki märte wzartqanın aytqan" bolatın. Onıñ "pana izdeuşi twlğa" kuäliginiñ merzimi biıl şildeniñ ayağında bitedi.

Azattıq Qayrat Erlibekke qatıstı aqparattı Qazaqstan işki ister ministrliginen aluğa tırısıp jatır.

2016 jıldan beri Şıñjañdağı az wlttarğa qısım körsetile bastağanı habarlanğan. Sol kezde birneşe qazaq Qazaqstanğa bas sauğalap qaşıp kelgen bolatın. Solardıñ arasınan Sayragül Sauıtbay Şvecyadan bosqın märtebesin alsa, Qazaqstan biligi Qayşa Aqan, Qaster Mwsahan, Mwrager Älim men Bağaşar Mälikwlına bosqın märtebesin bergen.