Tarazda Qañtarda oqqa wşıp, qaza tapqan bes adamnıñ apellyaciyalıq sotı bastaldı. El arasında «Äruaqtar isi» atalıp ketken sot procesiniñ alğaşqı otırısı Jambıl oblıstıq sotında qaraldı.

23 mamırda ötken sot procesi bir jarım sağatqa keşigip bastaldı. Bwğan deyin ol birneşe ret keyinge qalğan. İsti sud'yalar Abidov, Atibekov, Dosımqwlov qarauda. Olar jurnalisterge procesti video-fotoğa tüsiruge rwqsat etkenimen, özderin tüsiruge qarsı ekenderin ayttı.

Ayıptauşı prokuror Sayahat Bağdatwlı sottan istiñ apellyaciyalıq satığa keluine baylanıstı is boyınşa tömengi instanciyalı sot şeşimimen raqımşılıqpen bostandıqqa şıqqan Ashat Täşekeevtiñ ükimin qayta qarap, tört jılğa bas bostandığınan ayıru jazasına kesudi swradı.

– Taraz qalasınıñ N2 sotınıñ şeşimimen sottalğan Täşekeevke qatıstı Qılmıstıq kodekstiñ 272-babınıñ 1-böligimen aqtau ükiminiñ küşin joyıp, Täşekeevti atalğan bappen kinäli dep tanıp, 272-babtıñ 1-böligimen 4 jıl merzimge, 272-babtıñ 3-böligimen 2 jıl merzimge bas bostandığınan ayıru jazasın tağayındap, QK 58-babınıñ 3-böligine säykes, tüpkilikti jaza 4 jıl merziminde bas bostandığınan ayırudı swraymız, – dedi prokuror.

Ashat Täşekeevtiñ özi prokurordıñ bwl ötinişine eşqanday reakciya bildirgen joq. Sotqa bwğan deyin prokuratura eşqanday ötiniş hattıñ köşirmesin jibermegenin, ükimdi qayta qaraudı bügin ğana estip twrğanın ayttı.

Qandı Qañtarda qaza tauıp, qalalıq sot sud'yası Bağdat Törebekwlı kinäli dep tanığan Nwrswltan Quatbaevtıñ äkesi Baqıtjan Şıñğısbekov iste eşqanday dälel bolmağanın, kuälerdiñ barlığına qısım jasalğanın ayttı. Ol sud'yadan ädil şeşim şığaruın swradı.

 – Bizdiñ balalardıñ eşqanday kinäsi joq. Qalalıq sotta biz barlığın kördik. Kuägerlerdiñ barlığı sud'ya Törebekwlına qağazğa arızın jazıp alıp kelip, «Qañtar kezinde bizdi eşkim tıñdağan joq. Azaptaldıq, zardap şektik» dedi. Biraq ol oğan qarağan joq. Tergeuşiler jwmıs istemegen. Tek qaralay bergen. Bizdiñ balalar qaytıs bolıp ketti. Olardıñ kinäsi söyley almağanında ma? Olar söyley almasa biz söyleymiz, – dedi ol.

Qañtarda qaza tapqan tağı bir sottaluşı Erjan Bayjanovtıñ anası Nigora Zakaryaeva tergeude zañsızdıqtar men bwrmalauşılıqtar bolğanın ayttı.

– İste balam oq tiip qaytıs boldı deydi. Meniñ balamnıñ ömirin qiyatınday oq timegen. Azaptau jasap, bel omırtqası sınğannan keyin qılmıstı jasıru üşin öltirgen. Meniñ balam BTR-ge eşqanday da oq atpağan. Beyne taspada jansauğalap qaşıp jatqan balalardı köresizder. Oq tigen balalardı azaptap, süyrep maşinağa salıp jatqanın köresizder. Biraq olardıñ arasında meniñ balam joq. YAğni qalanıñ basqa jerinen balam wstalğan. 12 sağat boyı qinau saldarınan ömirmen qoştasqan. Meniñ basqa wlım da, qızım da joq. Men öz ömirimnen qorıqpaymın. Jalğız wlımdı aqtau – parızım, – dedi Zakaryaeva.

Sot barısında advokattar men sottaluşı marqwmdardıñ tuıstarı iste tirkelgen beynetaspalardıñ köşirmesin berudi swradı. Olar qalalıq sot beynetaspalardıñ köşirmesin bermegenin alğa tarttı. Sot alqasınıñ sud'yaları Abidov, Atibekov, Dosımqwlov bwl ötinişti kelesi sot otırısında qaraytındarın ayttı. Kelesi sot otırısı 31 mamırda ötedi.

7 aqpanda Taraz qalalıq N2 sotınıñ sud'yası Bağdat Törebekwlı is boyınşa küdikti dep tanılğan toğız adam Ashat Täşekeev, Marat Bekbau, Ğani Kerimbaev, Nwrbol Erejepov, (Qañtarda oqqa wşıp, qaza tapqan) – Rays Rısbekov, Erjan Bayjanov, Nwrswltan Quatbaev, Toqtar Oşaqbay jäne Isatay Donbaevtı kinäli dep tanığan.