تارازدا قاڭتاردا وققا ۇشىپ، قازا تاپقان بەس ادامنىڭ اپەللياتسيالىق سوتى باستالدى. ەل اراسىندا «ارۋاقتار ءىسى» اتالىپ كەتكەن سوت پروتسەسىنىڭ العاشقى وتىرىسى جامبىل وبلىستىق سوتىندا قارالدى.

23 مامىردا وتكەن سوت پروتسەسى ءبىر جارىم ساعاتقا كەشىگىپ باستالدى. بۇعان دەيىن ول بىرنەشە رەت كەيىنگە قالعان. ءىستى سۋديالار ابيدوۆ، اتيبەكوۆ، دوسىمقۇلوۆ قاراۋدا. ولار جۋرناليستەرگە پروتسەستى ۆيدەو-فوتوعا تۇسىرۋگە رۇقسات ەتكەنىمەن، وزدەرىن تۇسىرۋگە قارسى ەكەندەرىن ايتتى.

ايىپتاۋشى پروكۋرور ساياحات باعداتۇلى سوتتان ءىستىڭ اپەللياتسيالىق ساتىعا كەلۋىنە بايلانىستى ءىس بويىنشا تومەنگى ينستانتسيالى سوت شەشىمىمەن راقىمشىلىقپەن بوستاندىققا شىققان اسحات تاشەكەەۆتىڭ ۇكىمىن قايتا قاراپ، ءتورت جىلعا باس بوستاندىعىنان ايىرۋ جازاسىنا كەسۋدى سۇرادى.

– تاراز قالاسىنىڭ N2 سوتىنىڭ شەشىمىمەن سوتتالعان تاشەكەەۆكە قاتىستى قىلمىستىق كودەكستىڭ 272-بابىنىڭ 1-بولىگىمەن اقتاۋ ۇكىمىنىڭ كۇشىن جويىپ، تاشەكەەۆتى اتالعان باپپەن كىنالى دەپ تانىپ، 272-بابتىڭ 1-بولىگىمەن 4 جىل مەرزىمگە، 272-بابتىڭ 3-بولىگىمەن 2 جىل مەرزىمگە باس بوستاندىعىنان ايىرۋ جازاسىن تاعايىنداپ، قك 58-بابىنىڭ 3-بولىگىنە سايكەس، تۇپكىلىكتى جازا 4 جىل مەرزىمىندە باس بوستاندىعىنان ايىرۋدى سۇرايمىز، – دەدى پروكۋرور.

اسحات تاشەكەەۆتىڭ ءوزى پروكۋروردىڭ بۇل وتىنىشىنە ەشقانداي رەاكتسيا بىلدىرگەن جوق. سوتقا بۇعان دەيىن پروكۋراتۋرا ەشقانداي ءوتىنىش حاتتىڭ كوشىرمەسىن جىبەرمەگەنىن، ۇكىمدى قايتا قاراۋدى بۇگىن عانا ەستىپ تۇرعانىن ايتتى.

قاندى قاڭتاردا قازا تاۋىپ، قالالىق سوت سۋدياسى باعدات تورەبەكۇلى كىنالى دەپ تانىعان نۇرسۇلتان قۋاتباەۆتىڭ اكەسى باقىتجان شىڭعىسبەكوۆ ىستە ەشقانداي دالەل بولماعانىن، كۋالەردىڭ بارلىعىنا قىسىم جاسالعانىن ايتتى. ول سۋديادان ءادىل شەشىم شىعارۋىن سۇرادى.

 – ءبىزدىڭ بالالاردىڭ ەشقانداي كىناسى جوق. قالالىق سوتتا ءبىز بارلىعىن كوردىك. كۋاگەرلەردىڭ بارلىعى سۋديا تورەبەكۇلىنا قاعازعا ارىزىن جازىپ الىپ كەلىپ، «قاڭتار كەزىندە ءبىزدى ەشكىم تىڭداعان جوق. ازاپتالدىق، زارداپ شەكتىك» دەدى. بىراق ول وعان قاراعان جوق. تەرگەۋشىلەر جۇمىس ىستەمەگەن. تەك قارالاي بەرگەن. ءبىزدىڭ بالالار قايتىس بولىپ كەتتى. ولاردىڭ كىناسى سويلەي الماعانىندا ما؟ ولار سويلەي الماسا ءبىز سويلەيمىز، – دەدى ول.

قاڭتاردا قازا تاپقان تاعى ءبىر سوتتالۋشى ەرجان بايجانوۆتىڭ اناسى نيگورا زاكارياەۆا تەرگەۋدە زاڭسىزدىقتار مەن بۇرمالاۋشىلىقتار بولعانىن ايتتى.

– ىستە بالام وق ءتيىپ قايتىس بولدى دەيدى. مەنىڭ بالامنىڭ ءومىرىن قياتىنداي وق تيمەگەن. ازاپتاۋ جاساپ، بەل ومىرتقاسى سىنعاننان كەيىن قىلمىستى جاسىرۋ ءۇشىن ولتىرگەن. مەنىڭ بالام بتر-گە ەشقانداي دا وق اتپاعان. بەينە تاسپادا جانساۋعالاپ قاشىپ جاتقان بالالاردى كورەسىزدەر. وق تيگەن بالالاردى ازاپتاپ، سۇيرەپ ماشيناعا سالىپ جاتقانىن كورەسىزدەر. بىراق ولاردىڭ اراسىندا مەنىڭ بالام جوق. ياعني قالانىڭ باسقا جەرىنەن بالام ۇستالعان. 12 ساعات بويى قيناۋ سالدارىنان ومىرمەن قوشتاسقان. مەنىڭ باسقا ۇلىم دا، قىزىم دا جوق. مەن ءوز ومىرىمنەن قورىقپايمىن. جالعىز ۇلىمدى اقتاۋ – پارىزىم، – دەدى زاكارياەۆا.

سوت بارىسىندا ادۆوكاتتار مەن سوتتالۋشى مارقۇمداردىڭ تۋىستارى ىستە تىركەلگەن بەينەتاسپالاردىڭ كوشىرمەسىن بەرۋدى سۇرادى. ولار قالالىق سوت بەينەتاسپالاردىڭ كوشىرمەسىن بەرمەگەنىن العا تارتتى. سوت القاسىنىڭ سۋديالارى ابيدوۆ، اتيبەكوۆ، دوسىمقۇلوۆ بۇل ءوتىنىشتى كەلەسى سوت وتىرىسىندا قارايتىندارىن ايتتى. كەلەسى سوت وتىرىسى 31 مامىردا وتەدى.

7 اقپاندا تاراز قالالىق N2 سوتىنىڭ سۋدياسى باعدات تورەبەكۇلى ءىس بويىنشا كۇدىكتى دەپ تانىلعان توعىز ادام اسحات تاشەكەەۆ، مارات بەكباۋ، عاني كەرىمباەۆ، نۇربول ەرەجەپوۆ، (قاڭتاردا وققا ۇشىپ، قازا تاپقان) – رايس رىسبەكوۆ، ەرجان بايجانوۆ، نۇرسۇلتان قۋاتباەۆ، توقتار وشاقباي جانە يساتاي دونباەۆتى كىنالى دەپ تانىعان.