Qazaqstannıñ bas prokurorı Berik Asılov biıl parlament minberinde jasağan bayandamasında Qañtar oqiğasında Almatıda äuejayğa barğan Äygerim Tileujannıñ konstituciyalıq qwqığı – kinäsizdik prezumpciyasın bwzıp, sot ükiminsiz onı «dini ekstremistik wyımdardıñ müşesi» dep ayıptay mälimdegen.

Äygerim Tileujan men Qalas Nwrpeyisovti Almatı äuejayın basıp aludı wyımdastıruşı degen. Bwl jöninde Tileujannıñ advokatı Aynara Aydarhan tiisti mekemelerge, tipti Senatqa şağım tüsirgen.

Sonday-aq, bas prokurordıñ sud'ya rölinde taratqan [is sotqa joldanbastan bwrınğı] aqparatına narazı belsendi azamattar  20 qañtarda «Bas prokuror Berik Asılov qızmetinen ketsin» degen onlayn peticiya jariyalağan.

Konstituciyanıñ 77-babında «adamnıñ kinäli ekendigi zañdı küşine engen sot ükimimen tanılğanşa ol jasalğan qılmısqa kinäli emes dep esepteledi» dep naqtı körsetilgen. Sarapşılar bas prokuror Asılovtıñ BAQ ökilderin paydalana otırıp osı zañdı bwzğanın öreskel, jauapkerşilikke tartıluı tiis qate äreket dep bağalaydı.

Jurnalist Äygerim Tileujan men tarihşı-pedagog Qalas Nwrpeyisov Qañtar oqiğası baylanıstı «Äuejaydı basıp almaq boldı» degen küdikke ilingen.  Äygerim Tileujan da, Nwrpeyisov te sol küni äuejayğa barğanın moyındağan, biraq tergeu taqqan ayıptardı joqqa şığardı.

The Qazaq Times