Belsendi Ermek Narımbaydıñ türmede aştıq jariyalap jatqanına 40 kün boldı. Advokatı Janar Balğabaeva 10 qaraşada türmege barğanmen Ermek Narımbaymen kezdese almağan, sebebi belsendiniñ tösekten twrıp, şığuğa şaması jetpegen. Bwl turalı Ortalıq Aziya jañalıqtar qızmeti jazdı.

– Aldında düysenbi küni barğan kezde Ermek jürip jürgen. Ol kezde kädimgidey wzaq jürgen. Ermek energiyasın ünemdep, kürt qimıldamauğa tırısatını tüsinikti. Ol öz akciyasın "bas aynalu akciyası" dep te ataydı, sebebi bası ünemi aynaladı. Ol kez kelgen närseden pozitiv tabuğa tırısıp, osılayşa äzildeydi. Mine, sonday "bas aynalu" akciyasında onıñ advokatqa şığuına şaması jetpedi. Därigerdiñ aytuınşa, qazir onı küştep tamaqtandıruğa negiz joq. Qazir tikeley Ermek Narımbay jatqan jerge kirgizuge rwqsat swrap, policiya departamentine ötiniş äzirlep jatırmın. QAJK ne dep jauap beretini belgisiz, sebebi bwğan deyin olar sottaluşılar twratın jerge advokat kirgizilmeui tiis degen, - deydi Janar Balğabaeva.

Osığan deyin Ermek Narımbaydıñ türme medpunktine jatqızılğanı habarlanğan edi. Qazan basınan beri aştıq wstap jatqan belsendi ädil saylau ötkizu, saylau uçaskeleriniñ hattamaların OSK saytına jariyalaudı talap etip otır. Belsendiniñ densaulığı naşarlap bara jatqan şaqta jaqtastarı men advokattarı, jaqındarı Narımbaydıñ häline alañdaydı.

"Ortalıq saylau komissiyasın Narımbaydıñ talabına qwlaq türip, ädil saylau ötkizuge jäne saylau hattamaların sayttarına jariyalauğa uäde beruge şaqıramın. Sol kezde Ermek aştığın toqtatar edi. Onıñ jağdayı äbden naşarladı" dedi Janar Balğabaeva.

Advokat Janar Balğabaevanıñ sözine qarağanda, aştıqqa deyin Ermek Narımbaydıñ salmağı 105 kilogramm bolsa, 10 qaraşa küni 83 kilogramm bolğan. Qan qısımı 130-180 aralığında qwbılıp twr. "80-ge deyin tüsip ketetin kezder boladı" deydi advokat.

Qılmıstıq atqaru jüyesi komiteti türmedegi belsendi Ermek Narımbaydıñ aştıq akciyasınan habardar ekenin, aştıq akciyasın bastağan 3 qazannan beri därigerler onı "baqılauına alğanın" bwğan deyin mälimdegen.