Bügin Almatı qalasında bir top azamat demokratiyalıq küşter koaliciyasın qwrıp 1 qırküyektegi prezident Toqaevtıñ joldauındağı kezekten tıs prezident saylauına qatıstı ündeu jasadı.
Qwrılğan koaliciyanıñ birikken otırısına qoğam qayratkerleri, sayasatkerler, jurnalister, qoğam belsendileri men zañgerler qatıstı.  
Demokratiyalıq küşter koaliciyasın qwruşı azamattardıñ memleket basşısınıñ 2022 jılğı qırküyektegi Joldauında aytılğan kezekten tıs prezident saylauına qatıstı
ÜNDEUİ
Biz Otanımızdıñ, halqımızdıñ aldağı tağdırına alañdaymız. Täuelsizdikten, memlekettilikten ayırılıp qalu qaupi üdep baradı. Şınayı demokratiyalıq bağıttan auıtqu odan äri jalğastı. Super prezidenttik jüyeni qayta jandandıru äreketteri jımısqılıqpen iske asıp jatır. Bwl prezidenttiñ tayaudağı, qırküyektegi joldauınan da ayqın bayqaldı.
Kezekten tıs prezident saylauın ötkizu, prezidenttik merzimdi jeti jılğa deyin wzartu, aldağı uaqıtta da bilik basında otıra beru, qazaq tilin qosaqtalğan deñgeyde qaldıru jönindegi Toqaevtıñ wstanımdarın qoldamaymız! Biz mwnıñ bärin qoğamda qarsılıq tudıratın demokratiyalıq qwndılıqtardan bastartu, nazarbaevtıq jeke bastıq, avtoritarlıq, totaritarlıq jüyeni jañğırtu dep esepteymiz! Jäne bwğan jol berilmeytindigin mälimdeymiz!
Memleket, halıq aldındağı jauapkerşilikti sezine, onı öz moynımızğa ala otırıp, biz barşa demokratiyalıq küşterdi – oppoziciyadağı sayasatkerlerdi, tirkelgen, tirkelmegen wyımdar men birlestikterdiñ jetekşilerin, belsendi müşelerin, sayasattanuşılardı, azamattar qwqığın qorğauşılardı, küreske äzir barlıq adamdardı qatarımızğa qosıluğa şaqıramız.
Bizdiñ bilik basındağılarğa qoyatın talaptarımız:
- Kezekten tıs prezidenttik saylau kün tärtibinen alınıp tastalsın! Onday saylau ötkizuge eşqanday qajettilik tuğan joq.
«Ädiletti Qazaqstandı qwruğa bağıttalğan tübegeyli jäne jan-jaqtı reformalardı sätimen iske asıru üşin halıqtıñ jaña senim mandatı kerek» degen Toqaevtıñ sıltauı – közboyauşılıq. Ädiletti Qazaqstan qwru üşin naqtılı sayasi reformalar qajet. Al ol reformanı iske asıru üşin halıqtan jañadan senim mandatın swrap, kezekten tıs saylau ötkizbey-aq qoysın. Tek qoğammen sanasıp, «Saylau turalı», Sayasi partiyalar turalı, jiın bostandığı turalı zañdardı halıqaralıq normalarğa säykestendirse, azamattardıñ konstituciyalıq qwqıqtarın şekteytin, erkin, taza saylau ötkizuge kedergi keltiretin, nazarbaevtıq täsilmen jasalğan baptardı alıp tastasa bolğanı. Saylau komissiyaların qwrudı özgertu, onıñ qwramın tübegeyli özgertu talaptarın orındasın. Baqılauşılardıñ, jurnalisterdiñ saylau barısındağı qızmetteri şektelmesin, aşıqtıqqa, jariyalılıqqa jol aşılsın. Osınday alğışarttar jasalğan soñ taza, ädil saylau ötkizsin. Halıq sonda öz tañdauın jasaydı. Demek, Ädiletti Qazaqstan qwru üşin prezident Toqaevtan keregi – sayasi erik-jiger, adaldıq, batıldıq, sözde twruşılıq!
-Prezidenttik merzimdi jeti jılğa sozu jönindegi prezident wsınısı qabıldanbasın!
Konstituciyanı «jasandı referendumnan» keyin tağı da jwlmalau, tüsten şoşıp oyanğanday bolu prezidentke jaraspaydı. Bwrınğı kezeñde özgertilip, qayta qalpına keltirilgen merzimdi tağı da qaytalau – jeke bastıq müddeniñ qamı.
- Prezident saylauı öz kezegimen 2024 jılı ötkizilsin!
Oğan deyin prezident qızmetinde otırğan, legitimdi emes prezident sanalğan Q.J.Toqaev özi uäde etken sayasi reformanı şınayılıqpen, naqtılı qolğa alsın.
-Sayasi partiyalardı tirkeuge qoyılğan kedergiler alınıp tastalsın!
Zañdağı jönsizdikter dereu arada tüzetilmeyinşe, Ädilet ministrligi arqılı tirkeu tärtibin alıp tastamayınşa, azamattardıñ wyımdarğa birlesu, memleketti basqaru isine aralasu qwqığı şektele beretin boladı.
- 2022 jılğı qañtardağı qırğın qasıreti boyınşa jauapkerşilikti moynına alsın!
Jappay tärtip bwzuşılıqqa qatıstı delingen ärtürli ayıptarmen qozğalğan qılmıstıq ister qısqartılsın! Dälelsiz, ayğaqsız, azaptau, qinau arqılı «moyındatılğan» kinäları üşin sottalğandardıñ isteri qayta qaralsın. Sayasi qudalaudağı barlıq sayasatkerlerge, belsendilerge bostandıq berilsin.
-Joğarıdağı talaptar orındalmağan jağdayda, Qasım Jomart Toqaevtıñ Qazaqstan azamatı retinde aldağı saylaularda prezidenttikke ümitker bolıp tüsuine, tirkeluine moraldıq, sayasi qwqığı joq dep eseptelsin!
Halıq seniminen ayırılğan adamğa halıq eşqaşan da jaña senim mandatın bermeytindigin jariya türde eskertemiz. Biz nazarbaevtıq bilik jüyesin öz ıñğayına oraylastıratın, jemqor, satqın, jağımpaz, biliksiz tobırlardıñ memleketti basqaruına qarsımız.
-Halıq wsınğan azamattar arasınan prezident boluğa layıqtı twlğalardı qazirden iriktep, talqığa salıp, saylauğa dayın twruımız kerek. Ortaq ümitkerdi qoldayıq!
Bwl kezekten tıs saylaudı qoldağandıq emes. Bilik basındağılardıñ «zañdastırıp» alğan oyın erejesin özgertpeyinşe, saylau nätijesiniñ bayağıdağıday boları anıq. Sondıqtan biz külli qazaqstandıqtardı mınağan şaqıramız:
- prezidentten, qos palatanıñ törağalarınan jäne barlıq deputattardan sayasi reforma jasau jönindegi joğarıdağı talaptardı orındatqızudı alañdarğa, köşelerge şığıp talap eteyik!
Bwl küreste bir bolatındığımızdı, közqarastar men wstanımdardağı özgeşelikterdi, kelispeuşilikterdi ısırıp tastap, Demokratiyalıq küşter koaliciyası töñiregine toptasatınımızdı tağı da mälimdeymiz jäne barşañızdı bilek tüyistiruge şaqıramız!
Koaliciya qwramındağı qoğam qayratkeri R.Särsenbaywlı bwl ündeudiñ Respublika prezidentine, mäjilisine, senatına, ükimetine jiberiletinin ayttı.